安東尼「收咧」，紐約人「收檔」！紐約人昨日宣布，陣中巨星安東尼膝傷要開刀做手術，將面臨4至6個月休養期，今季提早玩完。「藍橙軍團」早前放走史杜迪米亞，再加上安東尼收咧，今季常規賽對他們來說已提早完結，可以專心為下季準備。

安東尼開刀接受手術，今季提早收咧。

「藍橙軍團」繼日前放走史杜迪米亞之後，昨日又宣布主將安東尼受左膝傷困擾，要開刀接受手術。紐約人總監積遜表示：「我要等手術後先可以定個確實嘅時間表，醫生同我講安東尼4至6個月先可以重返賽場。會方認為依家畀安東尼休養，可以令佢有多啲時間復原，之後對我哋有更大好處。」

同時，積遜又承認安東尼的傷患非一日之寒，今次手術有望根治問題，教練費沙亦呼籲擁躉毋須擔心及不用灰心。

放埋史杜迪米亞 為未來兩季做準備

紐約人今季狀態低迷，現時在東岸以10勝43負於榜尾徘徊，入季後賽已是「Mission Impossible」。日前放走史杜迪米亞，便是為了騰空薪酬空間，為未來兩年組軍作準備。現時安東尼提早「收咧」，明早主場鬥熱火凶多吉少。

（開賽時間：周六早上8:30）