公鹿奇招谷票房,主場輸波勁羞家!公鹿日前為提升球票銷量出奇招,按照密爾沃基當地的天氣定票價,昨日主場對太陽一戰,部分波飛售價更加低至5美元(約39港元)。可是,這一招未能令球場爆滿之餘,球隊更以96:102輸波,認真「瘀皮」!

公鹿(左)奇招谷波飛銷量,點知冇效兼淪為別人笑柄。(美聯社圖片)

NBA常規賽周五秩序

周三戰果

華氏1度就賣1美元

公鹿場均只得約14,300人入場為球隊打氣,入座率在聯盟30隊中排尾4。去年班主易手後,新班主團決心重新打造公鹿形象,更希望透過起新球場,吸引更多球迷入場睇波。不過,新球場選址到現時仍未有定案,日前球隊總裁Peter Feigin又表示,新球場計劃可能需要市政府撥款資助,公鹿「搬家」一事一波三折。

為了提升球隊形象,公鹿管理層昨日大搞波飛促銷,見密爾沃基正處寒冬,決定氣溫華氏1度球票就賣1美元,如此類推,昨日對太陽有部分球票只要5美元就可買到。

不過,這一招不被傳媒看好之餘,更被揶揄:「5度就賣5蚊,咁如果氣溫跌到零度以下,咁波飛應該賣幾錢?」惟新波飛定價措施亦未見成效,昨日一戰只吸引12,311人入場睇波,公鹿最後亦以6分告負。