澳門大賽車今日Start！

第61屆澳門大賽車今日展開，兩名「香港驕傲」方駿宇及歐陽若曦（Darryl）都會出戰GT盃，挑戰人稱「澳門先生」莫他拿霸主地位。首位於F1試車嘅香港車手方駿宇必成車迷風頭躉，Darryl今年座駕化身檸檬茶一樣吸客！除此之外，今年三級方程式將出現首位女車手哥倫比亞嘅哥特倫，以及下季將為F1紅牛二隊上陣嘅荷蘭車手麥斯韋斯塔本，都仲未計賽車女郎，剩係講都咁多焦點，一年一度車壇盛事，梗係要落場睇先過癮啦！

歐陽若曦揸檸檬茶爭GT盃

今年初當選香港傑出運動員的賽車手歐陽若曦Darryl，今屆澳門大賽車將會與VLT維他檸檬茶拍住上，其座駕Aston Martin V12 Vantage GT3亦裝扮到成包檸檬茶一樣，力爭澳門GT盃。

「主場」出擊有信心

Darryl曾3奪澳門GT盃，有「波子王」美譽，多年後再戰GT盃亦由保時捷改駕Aston Martin。近日Darryl勤操體能，為今屆賽事做足準備，他充滿信心表示：「澳門係我主場，今屆更同香港最具代表性品牌合作，令我感到年輕、新鮮和充滿活力，更有動力去爭取好成績。」

方駿宇香港「掃街」備戰

突如其來的F1試車機會，令九十後賽車手方駿宇（Adderly）成為香港車壇歷史第一人，即使本年度澳門大賽車報名早已截止，仍然通融這位F1試車手補上出戰今屆澳門GT盃，其實方駿宇平日同普通港人冇分別，喺西班牙試車後，仲專登返咗香港「掃街」篤魚蛋食雞蛋仔「叉電」備戰，不同的是他有一個F1夢。

方駿宇上月在西班牙巴倫西亞Ricardo Tormo賽道完成測試蘇巴（Sauber）F1車隊的C31戰車，總計400公里，成為歷來首位測試一級方程式賽車的香港賽車運動員，獲得申請FIA超級駕駛執照資格，並造出1分14.885秒的當日最快時間，以0.013秒力壓同場為蓮花車隊試車的應屆歐洲三級方程式冠軍、來自法國的奧干（Esteban Ocon）。

酒精敏感「企櫈仔」照開香檳

方駿宇還有一個秘密，原來他患有酒精敏感，飲香檳都會出紅疹，這對於一個賽車手而言甚為苦惱，要是打入前三名「企櫈仔」開香檳點算？Adderly笑笑口表示：「為咗大家高興都會照飲，之後周身出紅疹都冇辦法啦。」

哥特倫首位澳門F3女車手

哥特倫（Tatiana Calderon）將會係自1983年以嚟，首個參加澳門格蘭披治大賽車三級方程式嘅女車手！上個月先踏入21歲嘅哥特倫絕對係美人胚子，擁有哥倫比亞人細緻嘅輪廓，但唔好睇佢個樣斯斯文文，佢已經連續兩屆參加歐洲三級方程式，今屆以第15名完成賽季，喺芸芸男士主導嘅賽車世界，算係一個成功嘅異數。仲有少少Baby Fat嘅哥特倫第一次嚟到澳門，佢之前接受訪問時表示，希望以自己能力證明，女性一樣可以喺賽車同男士睇齊。

韋斯塔本準F1車手挑戰東望洋

17歲嘅麥斯韋斯塔本（Max Verstappen）日前喺F1日本站為紅牛二隊出戰練習賽，成為史上最後生F1試車手，佢更會於下季為紅牛二隊出戰F1，有機會成為最年輕F1車手。麥斯韋斯塔本爸爸係前F1荷蘭車手韋斯塔本（Jos Verstappen），媽媽係一個小型賽車車手，肯定遺傳晒父母嘅賽車基因，佢今屆係首次嚟澳門比賽，由於嚟緊佢肯定專注F1賽事，港澳車迷要近距離欣賞佢手車，就千祈唔好錯過今屆澳門三級方程式。

其餘焦點車手

路達：格蘭披治電單車大賽：8屆「格電」盟主

莫他拿：澳門GT盃：連埋F3，5年內於澳門6奪冠軍

奧干：三級方程式：應屆歐洲F3冠軍

盧佩：東望洋大賽：提早贏得今屆FIA房車賽總冠軍

澳門大賽車時間表：11月13日（星期四）

7:15am：FIA世界房車錦標賽─澳門東望洋大賽─試跑

8:00am：澳門格蘭披治電單車大賽─練習

9:15am：華夏賽車大獎賽─練習

10:00am：澳門路車挑戰賽─練習

10:55am：澳門格蘭披治三級方程式大賽─練習

12:05pm：澳門GT盃─練習

12:55pm：澳門房車盃─ 練習

1:55pm：FIA世界房車錦標賽─澳門東望洋大賽─練習

2:45pm：澳門格蘭披治三級方程式大賽─排位賽

3:55pm：澳門格蘭披治電單車大賽─排位賽

11月14日（星期五）

7:30am：澳門格蘭披治電單車大賽─排位賽

8:35am：華夏賽車大獎賽─排位賽

9:25am：FIA世界房車錦標賽─澳門東望洋大賽─練習

10:15am：澳門路車挑戰賽─排位賽

11:10am：澳門格蘭披治三級方程式大賽─練習

12:15pm：澳門房車盃─排位賽

1:10pm：澳門GT盃─排位賽

2:05pm：澳門格蘭披治三級方程式大賽─排位賽

3:10pm：FIA世界房車錦標賽─澳門東望洋大賽─排位賽

11月15日（星期六）

7:30am：澳門格蘭披治電單車大賽─ 賽前熱身

8:20am：華夏賽車大獎賽─10圈

9:50am：澳門路車挑戰賽─10圈

11:20am：澳門房車盃─12圈

12:50pm：澳門GT盃─排位賽

1:45pm：澳門格蘭披治三級方程式大賽─選拔賽─10圈

3:30pm：澳門格蘭披治電單車大賽─12圈

11月16日（星期日）

7:00am：特備節目

9:00am：澳門GT盃─12圈

10:30am：FIA世界房車錦標賽─澳門東望洋大賽─兩回合各10圈

1:45pm：特備節目

3:10pm：舞獅

3:30pm：澳門格蘭披治三級方程式大賽─15圈