東岸重量級大戰勁驚嚇！騎士昨晨美國時間萬聖節造訪聯合中心，與今季同樣組成「三巨頭」的公牛上演東岸超級大戰，最後騎士加時贏114:108，球迷緊張之餘肯定嚇餐飽，事關先有勒邦占士（LeBron James）扮女人已經得人驚，比賽途中「玻璃腳」戴歷羅斯（Derrick Rose）又再拗柴，心血少的球迷隨時嚇破膽。

占士（右）重拾手感，助騎士贏波。（法新社圖片）

NBA常規賽周一秩序

騎士首戰主場意外不敵紐約人，勒邦占士重返母會第一擊慘吃悶棍，但看來無損「大帝」心情，在萬聖節依然整古做怪，不過人人扮鬼時，愛出位的LBJ就選擇扮女人，創意同驚嚇指數都爆燈！

占士回勇入36分

雖然賽前占士扮女人「攞晒彩」，始終球場上的焦點又重回「大帝」鬥「牛魔王」一戰。公牛王牌戴歷羅斯狀態大勇，只打3節已攻入20分，惟在第2節剩4分鐘時，補籃得手後左腳落地踩中艾榮（Kyrie Irving）導致左足踝扭傷，現場球迷不禁倒抽一口涼氣。雖然D.Rose下半場一度重返球場，但最終仍要提早退下火線。

公牛第3節完結落後9分，羅斯又在最後一節做觀眾，然而公牛仍憑軒域治（Kirk Hinrich）及布魯克斯（Aaron Brooks）於該節合共攻入18分，再加上諾亞（Joakim Noah）成功守住騎士路夫最後一擊，令比賽進入加時。可惜，加時變成LBJ的個人Show，占士於加時多次博得犯規射入8分，結果騎士以6分之差勝出這場東岸大戰。

戴歷羅斯：受傷係上天嘅考驗

公牛輸波事小，「牛魔王」傷勢事大，幸好戴歷羅斯賽後立即向球迷大派定心丸，強調只是輕傷，應可在今早作客木狼一戰上陣。他說：「唔使大驚小怪喎，今次只係輕傷。我認為受傷係上天對我嘅考驗，不過今次只係好小事，我一定可以渡過難關，我會嘗試出戰對木狼嘅。」