皇馬左閘馬些路早前放假，去咗參觀巴西里約熱內盧警察特種部隊（BOPE）總部，仲揸支M16步槍同特種部隊成員合照。不過馬些路可能因為咁，違反皇家規條惹禍上身。

C朗被爆 約Paris蒲夜店

呢位巴西國腳喺世盃後放暑假，去咗參觀BOPE總部，同唔少特種部隊成員合照，佢仲揸住支M16，Chok晒樣影相。不過Chok得咁開心隨時有手尾跟，雖然呢張「M16相」喺假期影，但可能違反皇馬內部規則，影響球會形象，隨時會畀教練安察洛堤照肺。不過馬些路隊友C朗仲濕滯，西媒爆佢邀請名媛Paris Hilton去自己間夜店Happy，期間二人表現親暱，睇怕返去都有排向女友伊蓮娜解畫。

講起揸槍影相會出事，巴甲法林明高有位球迷，竟然夠薑喺車揸住支槍同朋友自拍，仲放埋上facebook！巴西警方話已查明相中人係邊個，現時要睇吓佢哋同走私軍火有冇關係，先會再作進一步嘅行動。