全新巴塞起航！經過上季慘淡嘅一季，今季巴塞決心開拓新時代，新教練同新隊長唔在講，仲要有新中堅、新隊巴、新球迷通道同新攻擊武器。尋日凌晨巴塞排出久遺嘅「拉馬西亞正選11人」陣容，結果以6:0大炒赫爾辛基，皇馬要睇路呀！

華美倫加盟巴塞後將着上23號球衣。（Getty Images圖片）

巴塞今季由新教練安歷基同新隊長沙維帶領，之前喺熱身賽表現都幾曳，不過大家睇得出，其實巴塞高層好有決心改革，好似大軍去芬蘭踢熱身賽，就有新設計大巴載球員去機場。而且魯營球場嘅球員通道，都專登以球迷相片做設計，目的係要球員知道，每次出戰都背負所有巴塞粉絲嘅期望，更加畀心機踢波。

新星夏達迪 熱身賽梅開二度

唔止咁，巴塞對赫爾辛基仲有18歲新星夏達迪上位，佢細個喺街場踢波被發掘，加入巴塞青訓系統後，試過單季29場勁入32球。呢場佢打正選梅開二度，協助巴塞開波24分鐘已經領先4球，最終巴塞少咗美斯、尼馬同蘇亞雷斯都以6球大勝對手，而且11個正選全部係拉馬西亞青訓出品，令人覺得巴塞王朝即將回歸。

至於新簽入嘅中堅華美倫，已抵達巴塞通過體測同影相見傳媒。《馬卡報》有調查顯示，華美倫係巴塞球迷心目中嘅首選中堅，支持度有37.2%，相反「臭彈狂徒」碧基繼搭飛機去芬蘭時搞事，專登係機艙放臭彈後，竟然喺對赫爾辛基嘅比賽，又喺球員通道放臭彈，認真大唔透，搞搞震結果支持度得番17.6%，連新仔馬斯巴查都不如。

事實上，巴塞高層的確好唔滿意條防線，最新消息仲話，佢哋想簽埋多蒙特右閘比薛斯基或者費倫天拿翼衞古達度添。另一方面，華美倫以1,500萬鎊轉會後，成為第8個離開阿仙奴入「營」嘅球員，期間兵工廠得到嘅轉會費達到1.35億鎊，足夠支付興建酋長球場嘅3分1支出（耗資約3.9億鎊），所以廠迷咪一味鬧巴塞啦！