「大帝」襲港父愛滿瀉！NBA巨星勒邦占士（LeBron James）昨日抵港，進行「RISE」籃球之旅第3站訪問。即將第3度做老竇的占士出名Family Man，昨日更父性大發，於親子訓練營大談湊仔經，又考慮將新波鞋加入囡囡元素，堪稱「絕世好爸」！

港大親子訓練營

范俊業帶囝囝出席親子訓練營。

占士父性大發，親身教小朋友打波。

逾300球迷塞爆花園街，場面墟冚。

連踩北京及廣州兩站後，占士昨晨乘私人飛機抵港，並於昨午先到波鞋街NIKE Store與Fans見面。約300名球迷塞滿花園街，更有球迷提早3小時到場霸靚位，要勞煩警方架起圍欄維持秩序。

提早3粒鐘霸位 300球迷塞滿花園街

占士甫到場即令球迷起哄，這位育有兩子的Family Man將第3度榮升Daddy，現與老婆莎雲娜迎接寶貝女誕生，介紹完LeBron XI新鞋後，被問到下一代球鞋會加入甚麼故事及元素時，占士表示：「我每對波鞋背後都有一個故事，下一對鞋或者會加入女兒嘅元素。」雖然尚未適應時差，但「大帝」全程笑容滿面，聽完球迷分享波鞋故事後，更借粉絲的「自拍神器」玩伸脷自拍，勁識冧Fans！

范俊業唔Mind囝囝 愛籃球多過足球

之後占士「轉戰」港大出席親子訓練營，見到小朋友後，佢即時父性大發，抱抱、擊掌兼送簽名籃球，又即席大談湊仔經： 「小朋友嘅笑容令我充滿力量，我希望各位家長都唔會逼子女揀選日後嘅路，無論做醫生、老師定籃球員都好，最重要係畀小朋友自己選擇，享受人生！」南華守門員教練范俊業，亦有帶同11歲囝囝范麒智出席，被問到會否介意囝囝喜歡籃球多過足球，范俊業稱：「阿仔啱啱升中學，幾樣運動都有玩，我唔介意佢打籃球，會由佢自己揀。」

「大帝」之後重臨旺角，到麥花臣室內場主持「Rise Challenge」籃球選拔活動，吸引了近1,500人到場睇「大帝」Show off，期間占士多次施展插花、投籃及大力鋤樽必殺技，將現場氣氛推至高峰。經過連串考驗之後，占士最終將「黃金門票」頒發給黃律堯，後者將代表香港前往上海繼續下一輪選拔。

在完成主要行程後，占士去到中環IFC的瑞士名牌愛彼錶專門店，出席私人酒會。這位愛彼錶代言人席間表現甚Nice，與職員合照絕不Say No，極盡親民。酒會完結後，「大帝」一行人轉到商場內一間意大利餐廳食飯，「叉足電」準備下一站台灣的行程。