馬刺「壞冷氣」奇招焗死「大帝」贏Game 1!馬刺昨日於主場與熱火上演今年總決賽首戰,由於球場冷氣失靈,場內溫度直逼攝氏32度以上,折磨到熱火「大帝」勒邦占士(LeBron James)抽筋無法完成比賽,馬刺以110:95滅「火」先拔頭籌,「LBJ」抽筋被抬走的情景更被馬刺球迷恥笑。

占士(紅衫)剷籃落地即抽筋,要由職員抬離場。(法新社圖片)

占士第4節出場後坐在後備席耷晒頭。(法新社圖片)

馬刺110:95熱火
柏加(9號)避過保殊(左)運球上籃。(美聯社圖片)

馬刺球場的冷氣在比賽中途突然失靈,一班入場睇波的球迷,更即時將球會送的海報變成紙扇取涼。勒邦占士在第3節已主動要求換出,當時左腳明顯出現問題,第4節一次跳投失手後再次舉手,坐在後備席時表情更相當痛苦。馬刺就在這時發力搶分,成功超前,迫使占士繼續「頂硬上」。惟完場前4分鐘一次剷籃得分落地後,「大帝」左腳完全不能屈曲,要由職員抬走,繼後只能在後備席看着球隊以15分之差慘敗。

球迷 飲品商爭住抽水

「大帝」上陣33分鐘攻入全隊最高25分,賽後稱自己第一次在沒冷氣的室內場打波:「我左腳抽筋,流失勁多水分。我知雙方球員、球迷都Feel到好熱,但我係運動量最高嘅其中一個。自己好唔慣咁嘅情況,我之前未試過喺冇冷氣嘅室內場打波。」「LBJ」大呼熱爆導致抽筋,但馬刺老將真路比利(Manu Ginobili)就說:「以前成日都喺勁熱嘅環境打波,今次咁樣好小事啫。」雙方在香港時間周一再在馬刺主場上演Game 2,聯盟高層已「落柯打」在賽前要修好冷氣。

馬刺旗開得勝,球迷即「抽水」恥笑勒邦占士抽筋被抬走,不少網民有樣學樣扮「大帝」出場姿勢。運動飲品商佳得樂更於twitter留言,狂寸佳得樂的敵對公司Powerade代言人「大帝」:「抽筋嘅球員唔係我哋啲客,我哋嘅球員絕對頂得住高溫!」