雷阿倫親手K.O.昔日好隊友！熱火昨日於季後賽主場迎戰籃網，雖曾在第4節落後8分，但終藉一段12:0的攻勢反敗為勝，以96:94險勝客隊，總場數贏4:1，躋身東岸決賽。熱火老將雷阿倫（Ray Allen）完場前32秒的一球反超前3分波，將曾一同効力塞爾特人的加納特（Kevin Garnett）及皮雅斯（Paul Pierce）送走。

周四戰果

柏加傷出馬刺照贏波晉級

雷阿倫2012年因從塞爾特人轉投熱火，而與當時的隊友加納特、皮雅斯交惡，「三劍俠」變成陌路人。雷阿倫早前說過：「我同加納特已經有兩年冇講過嘢，我試過主動同佢打招呼，但佢連眼尾都冇望我一眼。」雷阿倫今仗關鍵時刻攻入5分成為贏波功臣，完場後更拿走籃球，作為自己親手手刃兩名昔日好友的紀念品。

另一邊廂，馬刺雖有柏加（Tony Parker）因傷退下火線，但一眾後備球員表現出色，主場以104:82大炒拓荒者，總場數贏4:1晉級西岸決賽。馬刺發言人賽後表示，柏加傷勢不嚴重，不會影響出戰西岸決賽。