曼聯99年「3冠王」經典球星約基，尋日造訪香港管理專業協會李國寶中學，為「賽馬會學界足球發展計劃」進行校訪及落場表演，而且更破例接受傳媒訪問，雖然由於受曼聯限制，關於「紅魔」換帥同種族歧視等敏感提問一概唔回應，不過呢位千里達射手退役後身形並無走樣，而且功架十足令全校800名師生過足癮添！

約基（中）大Show球技，依然功架十足。

約基（右）同馬會CEO應家柏大把波經傾。

可以近距離睇英超球星獻技，學生們當然Happy。

避談曼聯易帥

呢項賽馬會同曼聯足校嘅合作計劃，之前已邀請過舒米高、菲臘仔等曼聯名宿校訪，今次主辦單位應傳媒要求畀約基接受訪問，可惜喺曼聯新聞官全程監察之下，擁躉最關心嘅曼聯易帥同近日掀起嘅種族歧視等熱門話題，均被曼聯官員阻止。

被問到對世盃嘅睇法時，約基話：「我睇好巴西，另外幾支南美洲隊伍都有機會，英格蘭喺分組強敵林立，要突圍唔易。」佢仲大讚入選英格蘭嘅曼聯前鋒韋碧克：「佢仲後生，參加世界盃可以累積經驗，希望佢能夠證明自己。」約基今次來港行程僅2日1夜，校訪後即晚飛返英國。