全明星賽聽朝開騷，球迷要睇星，球隊就忙於增兵。香港時間本周五便是NBA交易死線，預期湖人大前鋒加素（Pau Gasol）、魔術「3分王」艾夫拉洛（Arron Afflalo）等「搶手貨」將繼續成為交易傳聞主角，不過B仔最關注始終是埃文特納（Evan Turner）！

76人重建被迫放人

76人今季戰績不堪入目，會方亦着手「清貨」重建，計劃送走有價有市球員換取選秀權，圍繞陣中「準新人王」卡特威廉斯（Michael Carter-Williams）作核心組軍。被傳最大機會離隊的特納打從季初至今，幾乎每個禮拜都捲入轉會傳聞，對於記者沒完沒了的追問，特納坦言答都答到口臭。

這位小前鋒表示：「個個禮拜都有記者問我係咪準備離隊，如果係咁嘅話，我個個禮拜執行李都執到手軟喎！總之我要做嘅就係打好波，交易我控制唔到，亦唔到我控制！」B仔覺得特納好專業，即使76人急住「分手」，這位2010年「榜眼」仍保持高水準演出，今季場均能夠貢獻17.5分、5.9個籃板及3.6次助攻，簡直是全明星水準，小弟希望特納搵到頭「好人家」，畢竟場場交足貨都要睇住球隊慘敗，確實幾冇癮！