戴歷羅斯（Derrick Rose）強勢歸位挑戰勒邦占士（LeBron James）！新季NBA常規賽聽朝Tip Off，重頭戲必數衞冕隊伍熱火主場硬撼公牛。公牛Icon羅斯自踏足NBA後一直被占士騎住，就連電子遊戲《NBA2K14》封面都被「大帝」搶埋，克服左膝傷患重返戰場的「牛魔王」，新季就將遠程炮及彈跳力「升呢」，勢要向占士攞債！（now635台周三早上8:00直播）

羅斯（左）同占士注定係命中宿敵。

常規賽MVP賠率（只列頭10位）

NBA常規賽周三秩序

過去5個球季，占士總共掃走4次常規賽最有價值球員，剩餘1次就由羅斯奪得，不少球迷都認為「牛魔王」若能保持身體健康，個人及球隊榮譽應該更多。眼看公牛於上屆次圈季後賽被熱火大炒4:1，《NBA2K14》封面又被「大帝」橫刀奪愛，羅斯當然不是味兒。這位2011年MVP克服左膝十字韌帶重創，季前垂直跳躍不單止高過昔日5吋，就連3分球命中率都大大提升。

牛魔王外線愈射愈準

公牛後衞馬基斯泰古爾（Marquis Teague）稱：「啱啱康復嘅球員唔可以做太劇烈嘅動作，所以羅斯開頭都只係練吓遠射，不過佢就射上癮，次次我哋操完波去健身室嗰陣，佢都仲射緊，命中率仲提升唔少添，不嬲剷得嘅佢如果連3分都有埋，咁真係冇得嘜！」據《華爾街日報》統計，自03年起20位試過韌帶撕裂的26歲以下球員，16至23英尺命中率平均提升4%，羅斯於季前賽貢獻場均20.7分，3分命中率更高達44.4%，比生涯的31.2%高出超過1成。

熱火三王做足準備

面對射得又剷得的羅斯，熱火前鋒保殊（Chris Bosh）揚言已做足功課研究「牛魔王」，韋迪（Dwyane Wade）亦預期今戰肯定惡啃，王牌占士則對今場波保持平常心：「我嘅狀態已經接近十足，今季熱火首要目標係成就三連霸，有比士利（Michael Beasley）同奧登（Greg Oden）兩位高質生力軍加盟，相信熱火嘅戰鬥力足以同任何球隊抗衡。」

熱火內線薄弱問題一直未解決，面對有中鋒諾亞（Joakim Noah）傷愈復出的公牛定必輸蝕，讓到公牛5.5分略嫌太多，敲下盤着數。