香港桌球壇人材輩出，並在多個世界性賽事獲獎無數，但自從桌球項目被剔出亞運後，不少桌球好手都諗定後路，「安儀」亦不例外，目前正修讀會計高級文憑的她，將來或會成為會計師！

「安儀」表示：「雖然桌球啱啱先喺體院精英項目『續約』多4年，但4年後又點算呢？如果到時桌球跌出精英項目，咁做全職運動員就等同即時失業，所以都要為自己將來打算。自己17歲嗰年中五畢業就無讀書，全心全意去打波，但兩年前20歲時知道桌球被剔出亞運，所以我就決定重返校園讀基礎文憑，今年仲可以升讀高級文憑修讀會計，呢一切都為將來做會計師鋪路！」

不過，重返校園後，安儀表示最大得着是令自己更渴望打桌球：「要兼顧打波同讀書好困難，基本上為咗比賽，我起碼要走一半嘅堂，但我會努力補番。由於時間唔夠用，反而令我更珍惜練波嘅時間，更認真去做好每一步。」