咸美頓與女友Nicole拍拖時非常甜蜜，經常大晒恩愛。 （Getty Images圖片）

冠軍贈愛人，「黑帝」求箍煲！咸美頓前日喺F1匈牙利站奪冠，過程係就係刺激，但點都唔及佢嘅戀情精彩。「黑帝」贏完冠軍之後發表愛的宣言，話要將分站冠軍獻畀月頭先同佢掟煲嘅Nicole Scherzinger，咸美頓強調自己唔係花花公子，又大手筆豪使36萬鎊（約430萬港元）展開「浪漫行動」討Nicole歡心，睇嚟呢次箍煲大作戰唔係講玩喎！

咸美頓與女友Nicole拍拖時非常甜蜜，經常大晒恩愛。 （Getty Images圖片）

咸美頓前日喺F1匈牙利站奪標後，揚言將冠軍獻畀Nicole。（美聯社圖片）

咸美頓嘅場外生活多采多姿，一時又去洛杉磯錄歌，一時就去倫敦睇Jay-Z開騷，淨係兩個禮拜內就已經飛勻8個國家，The Pussycat Dolls前主音Nicole亦都大把Jobs，兩個人聚少離多，唔散就假啦！呢對戀人拍拖5年散過兩次，消息話Nicole喺月頭忍痛割愛，皆因覺得咸美頓對呢段情唔認真，遲遲唔訂婚期，不過「黑帝」就否認係花花公子，強調搭住架「Candy Red」私人飛機喪飛14,000公里都係為咗減壓。

策劃私人飛機旅程氹女

呢位F1車手唔係得個講字，上星期佢已經透過twitter寄意要珍惜眼前人，前日幫新効力嘅平治車隊贏得首個分站冠軍之後，仲即刻話要將冠軍獻畀「Special One」，大家咪以為係莫連奴，英國《每日郵報》追問呢個「Special One」係咪Nicole，咸美頓點一點頭，然後話：「當我一個人返到屋企，啲感覺就返晒嚟，真係好傷（分手）！」

據悉，咸美頓為咗冧番掂Nicole，已經Plan咗個價值9萬鎊嘅私人飛機旅程同愛人去玩，又豪使15萬鎊裝修到屋企個更衣室靚一靚氹Nicole回歸，加上早前送畀伊人價值12萬鎊嘅鑽石手鏈，「黑帝」起碼使咗36萬鎊箍煲，落咁重本，照計Nicole應該會回心轉意啩！