索爆拳后襲香港！睇開泰拳的朋友，通常會着重睇拳手間的技術、力量及意志對決，不過本月30日假九龍灣國際展貿中心舉行的「THE ONE世界拳王終極之戰」，大家除了可欣賞緊張刺激的泰拳外，更可一睹「法國拳后」羅蘭妮（Laurene Maryse）的風采，這位兼職Model睇得又打得，各位拳迷記住落足眼力！

現年23歲的羅蘭妮，求學時期慘成校園欺凌受害者，她表示：「當年我由法國到英國留學，遭遇好慘，同學成日欺負我，因此我去學自衞術，開始學習泰拳。」羅蘭妮15歲學習泰拳，自此迷上這項搏擊運動，後來跟隨前世界冠軍Karen Ousey學拳，並立志要成為世界拳后。

定居泰國 3年錄12勝

羅蘭妮畢業後一直保持練習，06年開始在英國打業餘賽，兩戰取得一勝一和，之後轉打職業賽，更索性前赴泰國曼谷定居，3年前開始踏足泰國擂台與當地高手對戰。過去3年羅蘭妮共上陣24場，錄得12勝12負。今年5月底在柬埔寨上陣，與對手激戰5回合後憑點數獲勝贏得金腰帶。

泰拳了得之餘，外表省鏡的羅蘭妮亦非常睇得，樣靚身材正的她追求者眾，同時亦屬贊助商寵兒，偶而還客串做Model兼拍廣告，不過羅蘭妮目標明確，泰拳才是正職：「我愛泰拳，好享受在泰國每一刻，感覺好充實，完全唔覺得悶。」今次賽事主辦人之一盧惠光，坦言第一眼見到羅蘭妮即「驚為天人」：「當時我仲以為佢係Model，後來先知羅蘭妮係泰拳拳后！」

羅蘭妮（Laurene Maryse）

年齡/國籍：23歲/法國

級別/戰績：蠅量級/12勝12負

職業：兼職廣告Model