滑浪女王慘變「賣肉女王」！澳洲美女滑浪好手吉爾莫最近人氣爆燈，除咗繼2011年後再次勇奪ESPY「年度最佳女子極限運動員獎」，又為新簽嘅Roxy滑浪隊拍攝世界滑浪錦標賽廣告，點知呢段廣告片唔見樣之餘，焦點更集中喺佢嘅身材之上，難怪出街後遭粉絲怒轟十足內衣廣告咁低俗！

焦點集中胸部

被譽為「世上最索運動員」嘅澳洲靚女吉爾莫雖然只得25歲，但已經係世界滑浪協會巡迴賽5屆冠軍，更啱啱再度獲頒ESPY「年度最佳女子極限運動員獎」，又曾經登上時裝雜誌《時尚（VOGUE）》，堪稱「滑浪女神」，唔怪得Roxy滑浪隊喺今個月初成功簽入吉爾莫後即刻進行鋪天蓋地嘅宣傳，近日仲幫佢拍咗條片宣傳呢位新援及嚟緊嘅世界滑浪錦標賽添！

點知喺呢條片長1分47秒嘅廣告入面，粉絲完全搵唔到吉爾莫嘅滑浪英姿同埋靚樣，影片焦點更反而集中喺佢嘅胸部、臀部同埋雙腿上面，仲有喺床上半裸睡覺及出浴等大膽鏡頭，似乎係想利用呢位靚女嘅健美身材「吸睛」多過宣傳賽事本身喎！

雖然吉爾莫本人似乎好滿意呢輯廣告效果，仲將條片擺上自己嘅facebook專頁度叫Fans睇，但就惹嚟極大反應，有粉絲勸佢：「根本冇必要搞條咁嘅片，專心啲滑浪啦！」更有人直指：「真係好失望，呢條片似內衣廣告多過滑浪囉，拍片嘅人只係呈現咗啲麻甩佬想喺滑浪比賽入面睇到嘅嘢！」

睇嚟吉莫爾想挽回粉絲嘅心，嚟緊一定要滑出好成績，唔好掛住Show身材喇。