碧基爭做撲克王搶6485萬獎金

鬥牛啤王碧基

洲際盃決賽慘食紅牌嘅西班牙國腳碧基，收拾心情後再戰世界高手，不過戰場就由球場轉去賭枱。原來碧基正出戰拉斯維加斯嘅世界撲克大賽（WSOP），為爭逐「撲克王」寶座，就連老友沙維嘅大婚都放飛機。呢位2011年歐巡賽季軍撲克好手愈戰愈勇，前日成功闖關殺入下一輪比賽，若奪冠將可獨得逾800萬美元巨額獎金！

鬥牛啤王碧基

碧基成功殺入下一圈賽事，實力唔弱。

皮雅斯比賽都要掛住按摩，成績好極有限。

一年一度嘅WSOP向來吸引唔少名人參賽，NBA球星皮雅斯（Paul Pierce）亦有參加奧馬哈市站賽事，不過一邊搵工人按摩一邊賭啤嘅佢技術麻麻，好快就畀俄羅斯籍對手踢出局。相比之下，碧基出戰嘅主賽事難度同權威性都係最高，6,352個參賽者來頭十足，淨係入場費都要成1萬美元，冠軍獎金就接近836萬美元（約6,485萬港元）。

歐洲賽季軍比併世界高手

事實上碧基個朵都唔差，佢係2011歐洲撲克巡迴賽季軍，拎到5萬歐元獎金（約50萬港元）。戴住Cap帽出場嘅碧基硬仗連場，同佢同組嘅對手有開撲克學校嘅名將梅斯迪，以及剛贏得荷里活撲克公開賽嘅安娜等等，但係碧基表現毫不輸蝕，3萬分底分一度勁贏至13萬分排小組第1，連WSOP官網都形容佢「同世界最好嘅撲克高手並肩」。

據報碧基之後喺其中一鋪嚴重失手，13萬分一下子跌剩1萬分，好在呢位西班牙球星依然保持冷靜，最終以19,400分完成前日賽事，成為15位晉級選手之一。過去有報道話碧基嘅智商高達140，屬於全世界僅得1%嘅「高智人類」，難怪佢球場賭場兩得意，仲追到夏奇拉呢位靚女，絕對係幸福男人。

晉級下一圈放沙維婚禮飛機

碧基依家喺拉斯維加斯分身不暇，就連老死沙維結婚都甩底！西班牙《世界體育報》爆料，沙維周六會同Nuria喺西班牙布拉內斯舉行婚禮，美斯、恩尼斯達等隊友都落實出席，不過碧基同佩奧爾就通知咗沙維唔會出現。其實巴塞早前爆出嘅「竊聽門」風波，已經揭發碧基「爛賭」性格，如果碧基拎到冠軍巨獎，睇怕要畀封「超級人情」先得啦！