澳洲桌球「一哥」羅拔臣嘅偶像係邊個？亨特利？奧蘇里雲？錯晒，勢估唔到佢竟然係近期重掌「車仔」帥印嘅莫連奴超級粉絲！同偶像「寸王」一樣，羅拔臣先喺英國球圈打響名堂繼而稱霸世界，佢亦同「Special One」一樣最喜歡拗頸，即使今季各大排名賽改行新制，令球手要面對「地獄賽程」而備受批評，偏偏呢位2010年世界冠軍卻拍手叫好，兼且逆流而上重登世界No.1，相信假以時日桌球壇「Special One」非羅拔臣莫屬！

雖然生於英式足球唔太流行嘅澳洲，但羅拔臣卻係一個標準球迷，由蘇拿効力嘅年代就愛上車路士，得悉「寸王」今夏重掌車仔後，呢部「墨爾本機器」即時舉腳贊成：「莫連奴回歸真係令我好開心，我相信史丹福橋嘅氣氛從此會大逆轉，佢喺呢度嘅地位係無與倫比。」雖然賓尼迪斯上季已經交足貨領軍贏歐霸盃，不過羅拔臣深信車仔喺「寸王」嘅「Special One」獨特魅力麾下會更上一層樓。

福地中國起孖重做「1哥」

其實羅拔臣同莫連奴都有相似嘅地方，佢哋同樣要離鄉別井搵食，經過刻苦奮鬥終於攞到傲視全球嘅成就。呢邊廂莫連奴首次領波圖入歐聯、歐協盃決賽就捧盃，嗰邊廂羅拔臣喺職業生涯頭6次殺入大賽決賽亦錄得全勝佳績，加上今年喺「福地」中國連贏中國公開賽、無錫公開賽錦標重登臨時世界排名第1位，11度打入決賽錄得8勝3負佳績，稱佢為「決賽之王」亦不為過。

職業桌球界喺揸Fit人赫恩改革之下，世界排名頭16球手喺新季各大排名賽都要由首圈打起，雖然新制度隨即惹嚟廣泛批評，不過一向喜歡接受挑戰嘅羅拔臣卻力排眾議：「個個都話由低打起會好辛苦，其實咁先可以令我成為更出色嘅球手。」事實證明佢唔係得把口，之前喺球員巡迴賽保加利亞站得亞軍，繼而再喺無錫奪冠，羅拔臣的確愈戰愈強，夠晒Special！

羅拔臣小資料

出生日期：1982年2月11日（31歲）

國籍：澳洲

臨時世界排名：第1位

職業生涯獎金：1,506,530鎊（約1,740萬港元）

一Cue最高度數：147度（4次業餘賽、2次職業賽）

一Cue過百次數：267次

威水史：世界冠軍（2010）、

排名賽冠軍（8次）

桌壇Special One資多啲：

我嘅壞習慣係……同朋友聚會最少遲到2小時。

我最叻煮……意大利粉同蜜糖雞翼。

桌球以外我最鍾意嘅運動係……澳式足球、板球、英式足球、NBA。

如果我唔做桌球手，我會係……online game畫面設計師。

成長以來最難捱時刻係……離開澳洲去地球另一邊打桌球。

我鍾意聽嘅音樂係……Timbaland、Metallica、Guns & Roses。

我最想一齊食晚飯嘅對象係……Nathan Buckley、米高佐敦、戈登拉姆齊（唔使佢下廚）。

我最喜愛電影係……月黑高飛（The Shawshank Redemption）。

我嘅桌球偶像係……韋德、亨特利、奧蘇里雲。

我細個成為職業球手嘅最大阻力係……缺乏生活費同懶於練習。

我第1次打147度係……14歲。

徐浩然