2013年NBA選秀會昨假布魯克林巴克萊中心舉行，縱然今屆盛事被視為「冇好嘢揀」，但連場「騎呢」好戲卻幕幕精彩！手執狀元籤的騎士反高潮揀選班納特（Anthony Bennett）已叫人「R」爆頭，路爾（Nerlens Noel）更慘由「準狀元」變「垃圾」，並閃電式過檔76人，認真「騎呢」！

準狀元變人球 路爾畀76人收留

今屆新秀質素平庸，最有睇頭乃肯塔基中鋒路爾及馬里蘭巨塔蘭恩（Alex Len），不過騎士就出乎人意揀選內華達大學拉斯維加斯分校大前鋒班納特，令前者成為NBA史上首位加拿大狀元。身高6呎8吋的班納特打大前鋒略嫌「細粒」，出任小前鋒則腳步稍慢，屬典型「唔三唔四」球員，騎士的決定無疑令球迷大惑不解。

至於被視為「準狀元」的路爾，可能受到左膝十字韌帶撕裂及私生活立立亂等負面問題影響，要「淪落」到第6位才被塘鵝（前身為黃蜂）揀中，事後塘鵝隨即以路爾加上2014年首輪選秀權交易76人全明星控衞賀列地（Jrue Holiday），堂堂「準狀元」慘變人球！至於奧拉迪普（Victor Oladipo）及奧圖波達（Otto Porter Jr.）則分別當選榜眼和探花。