哥迪奧拿依家咁有台型，原來全靠佢老婆。（Getty Images圖片）

成日都話「每個成功男人背後，總有一個偉大女人」，連哥迪奧拿亦唔例外。哥帥賢內助Cristina除咗精通詩詞及文化建築，同時更係潮流達人，成功將老公由昔日宅男變身球壇型佬，兩人關係亦師亦友，難怪哥帥從來唔嗌對方做老婆，人前人後都以「拍檔」相稱啦。

哥迪奧拿依家咁有台型，原來全靠佢老婆。（Getty Images圖片）

兩人邂逅經過，要從18歲嘅哥迪奧拿講起，當時「哥仔」喺西班牙買褲，行經Cristina屋企人開設嘅時裝舖頭，與「女神」初次接觸後，繼而戀愛再拉埋天窗，轉眼間結婚至今22載，養育3名子女。雖則Cristina做賢妻良母多年，但潮流敏銳觸覺依然，哥帥死黨兼助手Manel Estiarte亦大讚：「佢係一個傳統好媽咪同現今女強人嘅混合體，而且緊貼潮流同充滿智慧。」

今首次帶操順便行善

哥迪奧拿正因為身邊有Cristina呢位潮流達人做形象指導，造型獲得全方位改善之餘，亦都甘願做「愛妻號」：「如果電視播緊套好戲，我會連皇馬嘅比賽都唔睇去陪佢。」不過曾參加《全德超模大賽》兼獲得第3名嘅Hana Nitsche，尋日點評哥帥雖然讚佢有型：「3日唔剃鬚最啱佢，但麻煩將部電話喺褲袋拎番出嚟！」睇嚟哥帥仲要向「拍檔」多多請教。

至於哥帥喺前日結束首次記招後，佢嘅德語水平獲得唔少傳媒肯定，隨後喺拜仁體育總監森馬陪同下到訪安聯球場，除咗同對方喺草地合照，期間仲坐喺教練席廂作親身感受。哥帥今日將會帶領拜仁作首課操練，而且今次訓練大人睇要收錢，所得收入將會捐予德國水災災民。