真路比利（上）發波瘟，成為輸波罪人。（法新社圖片）

有人歡喜有人愁，熱火衞冕成功個個歡天喜地，與總冠軍擦身而過的馬刺則愁雲慘霧，繼Game6表現走樣之後，35歲老將真路比利（Manu Ginobili）昨日又試發波瘟成輸波罪人，「蝙蝠俠」賽後坦言挫敗感揮之不去，暗示或打消征戰多兩年的計劃，今夏宣布退役。

真路比利（上）發波瘟，成為輸波罪人。（法新社圖片）

於Game6總共有8次失誤的真路比利，昨於「搶7戰」末節4度失誤，包括完場前23秒被勒邦占士截去傳球，令落後的馬刺返魂乏術。各大香港討論區昨日均洗版批評真路比利「食錯藥」，有美國網民更改圖將「蝙蝠俠」列入熱火大軍行列，嘲弄該名阿根廷球員乃「無間道」。真路比利孭大鑊後情緒低落，賽後於記者會暗示考慮退休。

鄧肯誓捲土重來

真路比利稱：「連續兩場落敗嘅挫敗感好大，我係講過想打多兩年，但我已經打咗18年波，身心俱疲，好想陪吓屋企人。」一旦真路比利退役，馬刺GDP組合勢必瓦解並面臨重建工作。

年屆37歲的鄧肯（Tim Duncan）於記者會低頭落淚，但就承諾會捲土重來：「熱火奪冠實至名歸，呢場敗仗我會銘記於心，我仲有1年合約，意味住來季仲會繼續為衝擊總冠軍努力！」