珍惜眼前人，往往知易難行。對陳國明來說，第一次做爸爸的意義不僅迎來兩個小生命，還真切感受到死亡恐懼，對「珍惜」兩個字有更深的領悟，自言一夜間「大個仔晒」。短短一個多月「湊B」生涯，令他明白「做人父母甚艱難」，但得到的喜悅卻是超乎想象：「生孖，雙重辛苦，亦雙重開心；抱完大女，就忍不住湊埋細女，原來會更加Happy！」

上月初，陳國明「孖女」平安出世，家姐「澧如」比細妹「澧妍」早一分鐘誕生，然而「明嫂」阿Kit生完B後仍在產房「搏緊命」，由於失血過多，須立即進行急救，及後再接受止血手術，瞓足3晚ICU。「其實太太陀B過程已經漫長又艱辛，到臨盆那刻，以為BB出生了，應該安全吧，誰知仍有好大問題。就如古代人話，生仔『一命博一命』，老婆今次更是『一命博兩命』，我覺得阿Kit好勇敢、好偉大。」幸好「明嫂」最終能跨越鬼門關，採訪當日，見她經數周休養後已精神奕奕，回復紅潤面色。「國明」表示：「日後會將當日危急情況告知女兒，讓姊妹兩人知道，她們能夠來到這個世界絕不簡單，是母親用性命換來的。」

抱B「論盡」同細女耍冧

生仔難、湊仔難上加難。或許是「孖女」太細、軟綿綿，「國明」抱B時有點「哩Hea」，有次把細女弄得不舒服，竟情急對着「澧妍」說「對唔住呀！」好搞笑。問他湊B最「棘手」是甚麼？「各方面都『棘』，不但日日只能瞓4、5粒鐘，而且餵奶一點都不易，要氹先肯食；換片呢，可以一分鐘換一條；好多時放工或應酬完回家已經攰到死，但都要撐住，否則個女邊個理！BB？玩就好玩，湊仔完全是兩回事，難怪有朋友同我講『一個已經頭痛、兩個更加大鑊』。」嘴裏嚷辛苦，實質甜到漏，陳國明望住寶貝女「父愛」滿瀉：「對啊！即使工作遇到困難，返到屋企見到BB就甚麼都忘了，放開一切憂慮。」

魔鬼唔到要做天使爸爸

別看「國明」平時「大癲大肺」，他說為人父後變得更成熟：「做人處事學懂諗得多方面和長遠一點，BB的未來是我的責任，現在任何事都以家庭行先。」那麼你會做「魔鬼爸爸」還是「天使爸爸」？「我『魔鬼唔到喎』，天使啦！要我狠心鬧女打女，好難，但我不會把她（們）寵壞，會奉行我父母『賞罰分明』的教子方式。」

今日會與家人吃晚飯，享受「天倫父親節」的陳國明，本月27日將領軍出征仁川亞室運，對於首次要跟「孖女」短暫分離，這位為BB專登買了部智能手機的「天使爸爸」坦言「超唔捨得」：「離港10日惟有透過視像跟女兒見面，上機前又會同女兒影多一點相，得閒拿出來望望孖B，笑吓都好嘛！」快樂，就是這麼簡單。

陳澧如（大妹）

出生日期：13年5月6日（1個月10日）

體重：約9.1磅

陳澧妍（細妹）

出生日期：13年5月6日（1個月10日）

*比家姐遲出生1分鐘

體重：約7.8磅