基斯安達臣（11號）係熱火蟬聯東岸冠軍無名英雄。（法新社圖片）

「大帝復仇記」6．7上演！憑藉勒邦占士（LeBron James）攻入全場最高的32分，加上隊友韋迪（Dwyane Wade）「歸位」，熱火昨於東岸決賽Game7以99:76大炒到訪的溜馬，蟬聯東岸冠軍兼連續3年躋身NBA總決賽。「搶七之王」占士賽後豪言戰鬥力比6年前「升呢」50倍，並發表勝利宣言，誓要於本周五搵馬刺報卻橫掃之仇！

基斯安達臣（11號）係熱火蟬聯東岸冠軍無名英雄。（法新社圖片）

韋迪（左起）、保殊同占士連續3年率熱火殺入總決賽。（美聯社圖片）

熱火99:76溜馬
韋迪（左）及時回勇，帶領熱火贏得搶七關鍵戰役。（法新社圖片）

NBA東西岸季後賽形勢

連續3年入總決賽

東岸決賽「搶七」戰昨於邁阿密美航球場上演，溜馬憑大衞韋斯（David West）兩次鋤樽加上史堤芬遜（Lance Stephenson）、佐治希爾（George Hill）連續命中遠程炮，甫開戰就打出一段12:6攻勢，首節亦以21:19領先熱火。之不過於「搶七」例牌有貨交的占士，就於次節大爆發狂入12分，包括一下幾乎「撼頭埋框」的「拆你屋」，加上回勇的韋迪及雷阿倫（Ray Allen）合力貢獻31分，帶挈熱火以23分之差大炒溜馬，總比數贏4:3衞冕東岸冠軍，兼且成為史上第6支連續3年躋身總決賽的隊伍。

占士膺搶七得分王

全場貢獻「32+8+4」的占士，累積場均33.8分成為「搶七得分王」，周五帶領熱火於總決賽硬撼馬刺，當然希望延續強勢。翻查近33年戰績，聯盟總共出現過15次於前一輪系列賽以4:0橫掃對手的隊伍火併靠「搶七」晉級的球隊，結果「橫掃隊伍」贏足13次，雖然數據對馬刺有利，不過「大帝」就未驚過，更表示急不及待要砌低該支西岸盟主：「兩年前嘅總決賽輸畀小牛之後，徹底改變咗我嘅備戰心態，07年我為騎士出戰總決賽慘吞馬刺4蛋，但依家我嘅戰鬥力比當年勁50倍兼有晒經驗，根本唔使赦馬刺！」