昨晨嘅馬德里網球大師賽變成球星騷，C朗、法卡奧同沙治奧拉莫斯都有入場睇拿度對費利亞嘅8強賽事，不過法卡奧木無表情疑為轉會煩惱、C朗同伊蓮娜更激吻晒恩愛！

蜜運舒娃贏波同細威爭冠

早前被傳偷嗒巴西美臀小姐嘅C朗，連日嚟同伊蓮娜高調拍拖反擊，尋日伊蓮娜更以一身黑色性感透視裝陪C朗睇網球，佢兩個不時細聲講大聲笑，之後更情不自禁當眾熱吻。

坐喺隔籬嘅法卡奧亦帶埋大肚老婆Lorelei Taron入場，不過女方興高采烈，法卡奧就冇乜表情。尋日西班牙LaSexta電視台爆出摩納哥今夏以1,000萬歐元年薪利誘「老虎」加盟，教練雲尼亞里仲點名要撬埋域陀華迪斯大搞，又難怪法卡奧咁多嘢諗。

賽後喺更衣室同法卡奧合照嘅拿度，今場以4:6、7:6（7:3）、6:0反勝費利亞，殺入4強；女單方面，日前「斷正」畀狗仔隊影到同緋聞男友迪米杜夫喺街頭激咀嘅舒拉寶娃，尋晚準決賽以6:4、6:3淘汰伊雲娜域，贏得生涯500W將與S威廉絲爭冠。蜜運「娃姐」前晚打完8強向電視台攝影師鏡頭「題字」，寫上：「你係點樣捕捉到我哋嘅呢？」之後更嘴角含春話：「我唔知呀，不如你哋話我知！」