男友阿哥爆響口 古妮歌娃奉子成婚

舒拉寶娃、伊雲娜域、維迪蘇娃，個個都係現役網壇索女，但講到「網壇美少女鼻祖」，又點可以唔提古妮歌娃先？呢位樣靚身材正嘅俄羅斯退役網球手，眨吓眼已經同西班牙歌手男友Enrique Iglesias行咗11年，口口聲聲話冇計劃結婚嘅古妮歌娃，上星期被俄羅斯傳媒目擊同男友拍拖揀婚戒，突然之間想組織家庭？原來係奉子成婚！

現年31歲嘅古妮歌娃樣子甜美，出道以嚟同唔少體壇、樂壇名人傳過緋聞，但自從02年同Enrique撻着後就打風都打唔甩，好多人都問點解佢哋拍咗咁多年拖都仲未拉埋天窗，女方上年回應話「冇計劃同冇意欲結婚」，至於男方近期就向秘魯傳媒表示「現階段嘅關係好舒服唔想轉變」。呢頭夾晒口供講明唔想步入教堂，點知《俄羅斯太陽報》嘅狗仔隊就目擊佢兩個上周五連踩幾間大型珠寶店揀結婚鑽戒，真係令人抓晒頭！

凸肚揀鑽戒斷正畀小報

據俄羅斯小報爆料，古妮歌娃同Enrique當晚仲去咗撐枱腳，幾位目擊者都見到古妮歌娃凸晒肚，揀鑽戒揀得咁急唔排除係奉子成婚！有記者就呢單嘢問過古妮歌娃嘅經理人，佢話唔方便就前者嘅私生活作任何評論，但就冇否認大肚一事，擺到明有嘢隱瞞。最爆係Enrique個阿哥Julio尋日接受美國網站La Botana訪問嗰陣，竟然唔覺意爆響口！

話說Julio係咁答個美國網嘅：「Charisse Verhaert（Julio模特兒妻子）仲未懷孕，不過Enrique就快有個驚喜畀大家！」Julio冇講個驚喜係乜，但種種迹象都顯示古妮歌娃就快做媽咪，唔知佢會唔會學似「阿金」克莉絲塔絲咁，生完之後手痕想再戰網壇呢？係嘅話肯定係一眾男Fans之福喇。

古妮歌娃情史

96年•當年曾傳出佢同墨西哥藝人Montero拍拖，但戀情無疾而終。

97-02年•俄羅斯冰曲球員Fedorov同古妮歌娃離離合合，曾自爆雙方已經喺莫斯科秘密註冊結婚，但遭女方經理人否認。

99年•Bure撬國家隊隊友Fedorov牆腳，被指99年搭上古妮歌娃並喺翌年於佛羅里達州一間餐廳求婚。

01年•澳洲球手菲臘普西斯同古妮歌娃一度被譽為網壇金童玉女，但據講古妮歌娃好黐身，要求菲臘普西斯每日起碼打3次電話報到兼讚佢靚女，最終男方頂唔順嗌分手。

02年至今•西班牙唱作人Enrique喺02年拍《Escape》MV嘅時候同古妮歌娃擦出火花，交往至今一直感情穩定。

Anna Kournikova古妮歌娃檔案

出生日期：1981年6月7日（31歲）

國籍：俄羅斯

現居地：美國邁阿密

職業生涯最高排名：第8位

威水史：夥拍軒芝絲奪澳網（99、02年）及WTA年終賽雙打冠軍（98、2000年）

職業生涯累積獎金：3,584,662美元