活士沃恩fb承認戀情

不認不認還須認！近月多次否認撻着嘅美國高球天王活士同滑雪天后沃恩，尋日終於喺各自facebook公開二人戀情，並附上4張親密照滿足Fans（左圖左）。4年前因性癮病連環偷食，搞到妻離子散嘅活士，如今終於改過自新投入正常健康戀愛新生活，呢隻蜜運中嘅「老虎」話希望可以低調拍拖，同新女友齊齊再闖事業高峰。

被傳已久「秘密守得唔係幾好」

由一年前喺慈善活動相識，到今年2月初沃恩喺奧地利比賽遇上嚴重意外，坐活士私人飛機離開，二人嘅親密關係逐漸曝光，活士同沃恩尋日公布相戀，其實絕對唔令人意外。同活士一樣離過婚嘅沃恩話：「睇嚟呢個秘密守得唔係幾好，冇錯，我同活士拍緊拖，我哋近幾月由普通朋友變成戀人，我依家真係好開心。」

另邊廂，活士亦好有默契喺自己fb表示：「今個球季真係冇得彈，但其實喺場外一樣有美好事情發生咗，我認識咗沃恩，依家我哋已經喺埋一齊。」一向處理感情事低調嘅「老虎」，同時間仲喺fb上載4張二人合照，證明自己唔係玩玩吓，佢再補充：「好多謝各界朋友對我哋嘅支持，同埋尊重我哋嘅私隱，我哋希望未來可以好似普通情侶咁生活，然後繼續專心做運動員爭取好成績。」

就喺活士公開同沃恩嘅情侶關係之後，同日就有傳媒影到活士同前妻羅迪倫密會，不過大家可以放心，事關佢哋只係齊齊出席愛女嘅棒球比賽打氣，期間沃恩仲一直坐喺場外活士嘅座駕之內，默默等待。咁鬼識做，唔怪之得活士咁冧你啦！

沃恩 小檔案

出生日期：

1984年10月18日

年齡：28歲

國籍：美國

身高：1米78

項目：高山滑雪

威水史：奧運（1金1銅）、世界賽（2金3銀）