鹹網2900萬邀NFL蒲星拍AV

NFL「蒲星」愈蒲愈旺，新英倫愛國者球星格倫科斯基大隻又爛蒲，而且同AV女星Bibi Jones「感情」勁好，半裸合照熱爆全球網絡。美國《紐約時報》仲爆料，有色情電影網站睇中格倫科斯基嘅放蕩形象，打算用相等於佢1年波糧嘅375萬美元（約2,900萬港元）請佢拍鹹片！

23歲嘅格倫科斯基係NFL全明星級球員，佢除咗球場上表現好，球場外都好多出位行徑，所以儲埋好多擁躉，例如前年網上流傳大量佢同AV女星Bibi Jones嘅親密合照，當中有唔少格倫科斯基衫都剝埋，Bibi Jones就半裸T-back上陣，而且從佢哋嘅面部表情，仲睇得出非常享受拍攝過程，玩到癲晒咁。

Bibi Jones自爆色誘球星續約

除咗格倫科斯基人氣高企，其實Bibi Jones都係新聞女王，佢同格倫科斯基嘅親密照曝光後，曾經自爆受體育經理人所託，主動同至少10個美國職棒聯盟MLB球星上床鬼混，利用美色氹佢哋答應經理人嘅續約安排。格倫科斯基同佢玩得咁埋，自然成為AV迷偶像，獲邀演出成人電影唔出奇。

根據美國《紐約時報》報道，有成人電影網站計劃豪掟375萬美元，即係格倫科斯基1年波糧邀請佢親身演出成人電影，唔好嘥咗佢嘅天賦本錢咁話。鹹網同時亦想借助格倫科斯基嘅超級人氣，吸引更多人關注AV行業，仲講到出天價搵佢拍片有助整個成人電影業發展咁誇張。今次格倫科斯基獲睇好做AV界救世主，唔知Bibi Jones會唔會又幫手色誘佢入局呢？

狂派格倫科斯基 高比撐喪得夠自我

格倫科斯基係NFL狂派代表，早幾日佢雖然傷咗左手未好番郁唔到，但竟然照出席拉斯維加斯摔角活動，期間High過龍用右手獨臂亂跳亂Fing跳舞，進入忘我境界後，更加用絕招將旁邊嘅人撻低，完全冇諗過自己會再受傷。不過作為洛杉磯代表嘅湖人球星高比拜仁就開聲維護死黨，覺得大家唔應該限制格倫科斯基球場外嘅喜好同活動，撐佢喪得夠自我喎！

格倫科斯基知多啲

Robert James "Rob" Gronkowski

出生日期：89年5月14日（23歲）

出生地點：美國紐約

身高/體重：1米98/120kg

新秀順位：2010年第2輪第42順位

効力球隊：新英倫愛國者