女排超聯球隊出奇招搵「幼齒」宣傳洗霉氣

巴西排球隊出動「幼齒」洗霉氣？巴西排球超級聯賽球隊Sao Bernardo為咗吸引多啲小球迷入場，特別請嚟12歲小演員Larissa Manoela擔任童裝波衫模特兒，希望借呢位小美女嘅魅力幫球會轉運！

賣童裝波衫掠水

Sao Bernardo女子隊喺今季巴西女排超級聯賽首15輪賽事全部輸晒，依家喺10隊中排包尾，至於男子隊就位列聯賽中下游，好在無論兩隊波點衰都好，仍然有唔少忠實粉絲捧場，球會管理層就希望利用呢點賺多啲資金，近排仲請咗爆紅嘅12歲小演員Larissa Manoela做Model宣傳童裝波衫，希望藉此賣多啲衫同埋吸納小球迷。

人仔細細嘅Larissa就話自己太矮所以打唔到排球，但相當欣賞男子隊球星Giba，難怪呢位小美女做球會Icon做得非常落力。早前佢喺活動上幫球迷簽名同大派年曆，憑住可愛笑容吸引大批小粉絲撐場，不過講到場內成績，Sao Bernardo班球員就要加倍努力喇。