巴西金「排」女將圓夢 進軍「模界」行天橋

巴西金「排」女將Model夢成真！舊年幫巴西喺倫奧女排摘金嘅Adenizia雖然係頂尖排球手，但佢自細已經夢想成為萬人景仰嘅超級Model，經過多年努力，呢位森巴美女終於獲得一紙模特兒合約，進軍「模界」迎接新挑戰！

現年26歲嘅巴西女排副攻手Adenizia，由16歲開始就為球會同國家隊橫掃各大獎項，除咗南美排球錦標賽冠軍、世界女排大獎賽總決賽冠軍之外，佢更喺去年倫奧助巴西奪得女子排球金牌，絕對係世界頂尖女排明星之一！不過呢位金「排」女將早前自爆，真正夢想係成為好似偶像Gisele Bundchen咁嘅超級Model，原來身高1米85嘅Adenizia充滿模特兒資質，面對相機擺甫士絕對難佢唔到，細個嗰陣曾更密密接Job希望向「模界」發展，可惜因養母Dona阻撓而「收山」。

身高1米85上定化妝班

查實Adenizia一直未放棄夢想，佢自爆多年嚟除咗打波之外，一直都花唔少時間製作個人相集、上化妝班、同隊友交換衣着意見等，隨時為接Job做好準備，仲話自己雖然享受排球比賽，但更嚮往行天橋嗰陣成為全場焦點嘅感覺！皇天不負有心人，Adenizia終於喺去年12月獲巴西聖保羅一間著名模特兒公司青睞，簽約正式殺入模特兒界，實行「排」「模」雙線發展！

Adenizia雖然對做模特兒呢項挑戰感到無比興奮，但呢位靚女表示為咗報答當初提拔佢嘅教練，仍然會集中精神打好波，Model工作暫時只係副業。Adenizia仲話希望可以打多15年先退役，目前最重要嘅目標，就係為蟬聯下一屆奧運金牌備戰！不過佢亦承認運動員生涯短暫，暗示未來有可能瞓身發展Model事業，成事嘅話，人氣分分鐘直逼Gisele！