移師倫敦鬥紐約人 活塞眾星冇覺好瞓

活塞、紐約人決戰英倫！NBA總裁史端上年10月宣布將活塞對紐約人嘅常規賽移師倫敦上演，搞到活塞慘失「主場之利」，成班主將仲冇覺好瞓添！

NBA移師美、加以外嘅地方進行常規賽冇幾可，今次係聯盟成立以嚟嘅第16次，加上有紐約人撐場，難怪呢場常規賽咁受注目，波飛開賣4日已經售罄。能夠打入歐洲市場當然好，之不過聯盟將今場波列為活塞嘅「主場」，對於新季錄14勝24負嘅佢哋嚟講梗係蝕底啦！最慘係活塞前晚抵達倫敦後大把活動，呢頭要同Fans去觀光，轉頭又要同NBA班保安飯敍傾安全問題，後衞史杜基、韋爾拜林、前鋒維蘭紐華同謝拉寶高都話瞓得唔好。

反而全聯盟平均年齡最大嘅紐約人就好Enjoy，主帥活臣話成個禮拜得1場波打，又有得去倫敦叉電，勁正喎！紐約人啱啱大勝黃蜂反彈，今仗仲有森柏特傷愈復出，今晚就算讓到活塞6.5分，上盤都信得過。（now678台周五凌晨4:00直播）