韋迪搞性派對 焗女友玩埋一份

睇人咪淨係睇外表，出名係好爸爸嘅熱火球星韋迪，外表官仔骨骨，查實骨子裏鹹到出汁！一位叫Sandrina嘅神秘女子，因為金錢糾紛揭穿韋迪嘅變態真面目，原來「閃電俠」一直喺位於洛杉磯嘅私竇包養呢位豪放女，仲出重金「徵召」索女大搞性派對，最難以置信係連韋迪女友尤尼恩都「加入戰團」，荒唔荒唐啲呀？

「養女」劈腿怒閂水喉

美媒《FullCourtPumps》爆料，「閃電俠」同尤尼恩行埋之前已經包養緊Sandrina，唔單止照顧晒佢喺洛杉磯嘅起居飲食，仲貼埋錢畀佢隆胸。明明泊到個好碼頭，偏偏Sandrina就被韋迪揭發佢同另一位冇開名嘅NBA球員有路，「閃電俠」一怒之下閂水喉，Sandrina於是爆料還擊！

據Sandrina所講，韋迪同佢係性伴侶關係，仲話「閃電俠」沉迷性派對多過打籃球：「佢（韋迪）會喺邁阿密同洛杉磯揀女出席性派對，每人每晚有成1,500至4,000美元（約3.1萬港元）肉金，好重手o架！」Sandrina仲話，韋迪女友尤尼恩都知男友偷食，但又諗唔到辦法綁實「閃電俠」個心，惟有參與「徵兵」幫吓眼，間唔中仲「披甲」玩埋一份添！

明訪湖人 熱火讓唔起

前年先爭贏兩個囝囝嘅撫養權，上年又出書分享湊仔經，隨住呢單性愛醜聞通晒天，韋迪苦心經營嘅好男人形象宣告幻滅，難怪前日鬥爵士一戰打到心神彷彿，全場入得11分之餘仲同場邊球迷嘈交啦！熱火聽朝造訪湖人，主隊尋日靠高比拜仁同杜域侯活合力轟入62分，主場以104:88擊敗公鹿，表現全面復甦，睇嚟近況麻麻嘅熱火都幾惡啃，仲要讓「紫金兵團」3.5分？梗係信唔過啦，捧下盤啦！（now635台周五早上11:30直播）