安東尼崩潰節食

麥迪遜廣場公園上演「NBA版竊聽風雲」！安東尼同加納特嘈交單嘢餘波未了，「甜瓜」亦因而被揭發婚變，估唔到紐約人行政總裁杜蘭冇撐安東尼不特止，仲暗中派出兩位麥迪遜廣場公園職員監聽佢，當正「甜瓜」癲佬咁款。安東尼畀人逼到失常自爆節食咗半個月，日前出席新鞋發布會更加神情呆滯，成個人落晒形，真係陰功豬咯！

裝收音器錄甜瓜講乜

早排加納特出言侮辱安東尼老婆LaLa，搞到呢位紐約人球星發晒癲，賽後幾乎搵「KG」開拖咁滯，消息指杜蘭事後好火滾，不過呢位紐約人行政總裁唔係嬲「KG」咁口臭，而係質疑安東尼嘅情緒有問題。據《Star-Ledger》尋日爆料，上星期紐約人主場輸畀公牛場波，杜蘭分別放咗兩條針坐喺紐約人後備席附近同角落頭位，佢兩位都揸住一部高科技遮形收音器，全場錄低安東尼講過乜，然後Send番個Copy畀杜蘭，研究吓安東尼係咪失常。

甜瓜老婆冇諗過離婚

遮形收音器咁揚，你當班記者盲o架咩？呢單嘢尋日通晒天，唔少網民都插到杜蘭飛起，炮轟佢影響球會形象，同時對安東尼深表同情。場上同人頂頸、老闆唔撐、鬧緊婚變，「甜瓜」自爆以「精神原因」為由節食咗半個月，懶理球會營養師勸告，咩肉都冇食過，怪唔之本周一對黃蜂明顯打到腳仔軟，全場25次起手炒咗16球啦。

安東尼早兩日為新鞋「Jordan Melo M9」舉行發布會，「甜瓜」當晚傻吓傻吓，塊面仲瘦咗唔少，睇見都心痛，不過據佢老婆LaLa嘅密友向《FullCourt》放料，LaLa根本冇諗過要離婚，分居只不過係想冷靜吓，希望「甜瓜」收到呢個消息會盡快振作啦！