2013狂想Style

Happy New Year！2012末日狂想爆唔出，但就爆出Psy呢個年度神話，有邊個估到一個肥叔跳騎呢舞會紅爆全球，證明只要敢諗敢想，乜都可能成真。2013年體壇好戲等緊你，1月先有澳網、3月有香港「傑運」選舉頒獎禮，到8至10月全運會、東亞運等重頭戲……好戲連場驚喜不斷，我哋就嚟個2013狂想曲，睇吓有幾多年度神話應驗？

美斯投皇馬收「費高豬頭」 C朗返紅魔贏歐聯

幾經波折，C朗响冬季轉會窗終重投費格遜懷抱返曼聯，而皇馬會長皮里茲就炮製本世紀最轟動轉會，以2.5億歐元由死對頭巴塞隆拿羅致美斯！美斯呢次世紀轉會令佢超越費高同勒邦占士，成為體壇史上最大叛徒，3月頭場國家打吡雖然喺巴拿貝踢，但有巴塞球迷就帶埋豬頭入場掟美斯，勁陰功！C朗返番曼聯之後喺5月終有機會再同巴塞交手，但地點係溫布萊球場嘅歐聯決賽，結果C朗大演帽子戲法幫紅魔以3:2砌低「地上最強」捧盃，爵爺賽後話係時候退休，搵嚟哥迪奧拿接手開闢另一個王朝！

歐聯決賽：5月25日（倫敦）

林書豪滅「火」首奪冠軍指環 出埋梳化爆Sosanity

「Linsanity」將不可能變可能，火箭喺林書豪同占士夏登帶領下高歌猛進，殺入NBA總決賽兼砌低3巨頭勒邦占士、韋迪同保殊，粉碎熱火衞冕夢，首奪冠軍指環！林書豪舊年喺前紐約人隊友菲爾斯屋企瞓梳化，瞓咗幾晚後張梳化即升價十倍勁多人Bid。捧盃後嘅佢亦人氣爆燈，搞到瑞典家具品牌IKEA睇準時機，搵J.Lin做代言人推出「林瘋梳化（Sosanity）」，結果賣到斷晒貨，帶挈林書豪開拓埋北歐市場，繼續刮大「瘋」。

4月20日起‧NBA季後賽（美國）

李慧詩世界賽起孖 牛下建銅像

倫奧銅牌「女車神」李慧詩（Sarah）踏入2013年愈踩愈勁，喺2月世界場地賽強勢「起孖」，包辦競輪、爭先賽金牌，成為第一個着上「彩虹戰衣」嘅香港女車手。佢嘅成就亦令一直當運動員係「鍾無艷」嘅香港政府「醒覺」，為李慧詩喺牛頭角下邨豎立「銅像」。之後Sarah再次大突破，兼項踩埋公路賽，仲喺遼寧全運贏冠軍，延續香港單車隊喺全運「屆屆有金執」嘅威水紀錄。

2月20至24日‧世界場地錦標賽（白俄羅斯）

8月31至9月12日‧全運會（遼寧）

朴泰桓爭贏金妍兒重新振作 贏孫楊復仇光榮退休

南韓3大國寶朴泰桓、朴智星、金妍兒嘅3角戀緋聞傳咗幾年，「雙朴」之爭終於分出勝負，朴泰桓鍊贏星仔贏得美人歸，同「花滑女王」金妍兒公開戀情兼訂埋婚。朴泰桓得到愛情滋潤亦重新振作，喺世界賽贏番中國宿敵孫楊一吐倫奧烏氣，光榮退休進軍娛樂圈，金妍兒亦重奪世界花滑冠軍，為衞冕冬奧金牌儲足彈蘗。

3月10至17日‧世界花滑錦標賽（日本）

7月19至8月4日‧世界游泳錦標賽（西班牙）

維度爾變囂爆賤男冇得撈 舒麥加出山再封王

23歲德國「新車神」維度爾2012年創造歷史做咗最年輕F1「3冠王」後畀勝利沖昏晒，性情大變，原本低調、慳家、乖仔又專一嘅佢突然變成賤男，仲冇本心過英超「腦殘」巴洛迪利，囂爆態度人人喊打，表現跌Watt場場食白果，結果畀紅牛炒魷冇得撈。紅牛惟有搵「七冠車神」舒麥加再度出山救亡，估唔到後日（3號）滿44嘅「老舒」又真係交到貨，揸住「火星戰車」贏埋個人第8次總冠軍添！

3月至11月‧F1合共20站

舒拉寶娃搭上「火箭Justin」 橫掃大滿貫再生B

舒拉寶娃同胡查錫掟煲之後冇着落，但4月中就26歲嘅佢一直恨嫁，加上佢住喺美國平時最鍾意入場睇NBA。「舒娃」唔想再尋尋覓覓決定喺籃壇揀仔，卒之同「火箭Justin Bieber」柏臣斯撻着！佢拍拖後亦人逢喜事愈戰愈勇，橫掃今年4大滿貫重登「一姐」寶座，最高興係年尾仲傳埋有喜，學似克莉絲塔絲咁去生B暫別網壇，等到時機成熟先復出，以「舒媽」身份再戰網壇！

澳網：1月14至27日（墨爾本）

法網：5月21至6月9日（巴黎）

溫網：6月24至7月7日（倫敦）

美網：8月26至9月9日（紐約）

劉翔神奇康復變長短腳 苦練單腳跳爭金牌

喺美國養緊傷嘅中國「欄王」劉翔，年初神奇康復，但就慘變長短腳，難得佢雄心不滅唔願退休，點都要重返田徑場，結果匿埋苦練新秘技喺8月世界賽復出！不過唔係參加跨欄賽，而係轉玩國際田聯特別為佢而設嘅新賽項——110米單腳跳，結果「劉天王」超班奪冠，佢仲豪言要鬥埋2016年里約奧運，攞番面金牌先收山。

8月10至18日‧世界田徑錦標賽（俄羅斯）

傅家俊「包包」好腳頭 世界賽KO小丁捧盃

香港桌球「天王」傅家俊榮升做老竇之後大行事業運，佢寶貝女「包包」（Alicia Belle，Marco夫婦鍾意叫佢「包包」）勁好腳頭，旺住爹哋，Marco雖然要忙住湊女餵奶，連去廁所都冇時間（呢樣係佢喺微博自爆嘅），但落場打波反而仲醒神，贏到開巷，無他嘅，要努力賺奶粉錢嘛！Marco帶埋老婆囡囡打世界賽過關斬將，最後喺「中國人打吡決賽」KO丁俊暉奪冠，一家三口捧盃羨慕死人，「小丁」唔抵得，當場宣布結婚生仔沖喜！

4月20至5月6日‧世界桌球錦標賽（謝菲爾德）