戴利執哈利二攤

跳水神童人細鬼大、追王子舊情人？英國跳水「萬人迷」戴利近日再傳緋聞，對象竟然係大佢足足11年嘅哈利王子前緋聞女友Lauren Pope，哄動全城，二人上個禮拜十指緊扣出席名人派對，任影唔嬲，爆出2012年壓軸最勁爆體壇Gossip，英國報章都大呼「戴利又一次驚震倫敦」！

相差11年同泰利搞婚外情

作為全英寵兒，18歲戴利唇紅齒白身材Fit，引死唔少雌性動物，倫奧期間連前A高嫂Cheryl都話嗒糖，之前一直被傳同美國跳水明星Kassidy Cook拍拖嘅佢，上周日參加完BBC年度大獎頒獎禮後，就轉場去倫敦市中心名店嘅Party，全程拖實英倫最紅DJ Lauren Pope，十指緊扣舉止親暱，鬼咁高調慌死冇人知。

呢單Gossip咁轟動，除咗有兩個主角年齡相差11歲嘅「姊弟戀」噱頭，仲因Lauren Pope背景唔少嘢，呢位29歲金髮女郎Model出身，做過英國《太陽報》三版女郎，講真個樣麻麻，勝在身材夠勁；佢07年開始DJ事業，當選《Nuts》雜誌「全球最Sexy DJ」，曾經同球星泰利搞過婚外情，甚至畀英國傳媒列入英國隊WAG當中。

不過講到最巴閉，一定係「王子緋聞女友」呢個「朵」，據講Lauren舊年喺酒吧邂逅哈利，二人即刻撻着當場激咀，可惜之後Date咗幾次，戀情就無疾而終，佢受訪時仲話「自己拒絕王子追求」添！戴利今次疑同王子做「老襟」上晒報紙頭條，英傳媒已認定呢段「姊弟戀」，但Lauren就喺twitter否認，聲稱同「神童」只係朋友關係，絕對冇下文！真係信不信由你喇！