李娜赴日參賽被斥漢奸

AC米蘭喺意甲輸埋畀烏甸尼斯後，打咗4場波得嗰3分，係14年嚟最差開局，小Sun入場除咗睇見AC輸波外，仲見到烏甸個青年軍教頭同班中國球迷傾咗一輪後，就舉起「釣魚島係中國」嘅標語，話要同中國球迷打招呼喎，但其實佢知唔知個標語係咩意思呢？

呢邊有外國人撐中國保釣，嗰邊中國金花李娜就因為赴日出戰被斥係漢奸！事關李娜、彭帥同鄭潔等球手仍決定如期參加泛太平洋網球賽，為爭取排名努力，小Sun收到風佢哋畀網民炮轟，有網民認為李娜喺敏感時刻到東京作賽，係只求成績同獎金但「喪失尊嚴」，更有人指摘呢啲係「漢奸」行為。喺呢段「非常時期」，賽會亦特別緊張，要求傳媒採訪時禁止向球員提出「為何參賽」等問題。