綠軍Big3時代告終
加納特黯然告別NBA？早前KG友人爆料，指該位塞爾特人老將戰罷今季便退役，昨仗「綠軍」於完場前28.3秒大勢已去，教練李華士一口氣將所有主力換走，當中眼泛淚光的KG就逐一與隊友、教練團擊掌及擁抱，疑似向一眾戰友告別，「綠軍」三巨頭時代亦隨時告終！
從電視直播所見，雖然雷阿倫及皮雅斯都在同一時間被換走，但全場貢獻14分及7個籃板的加納特就成為焦點。該名36歲球星與眾職、球員擊掌後，便攬着同樣眼濕濕的主帥李華士咬耳仔，美媒紛紛揣測KG已經為「綠軍」完成告別戰。
KG逐個擊掌道別
執多一星期行李「用唔着」，雷阿倫季尾正式約滿，加納特亦疑似退役，三巨頭時代面臨告終，教練李華士賽後出席記者會時感觸良多：「我唔清楚三巨頭去向，一切要等7月份自由球員市場重開先有答案，但我好鍾意呢班球員，只係想繼續同佢哋並肩作戰。」李華士哽咽着發表後便搭一搭朗度右肩然後離席，讓「綠軍」的球季在淚水中結束。