史碧奇李開腔撐林瘋留隊

瀕臨出局邊緣的紐約人昨日再收噩耗，巴朗戴維斯證實因右膝重創至少要抖1年，加上看守教練活臣暗示明日對熱火的生死戰J.Lin上陣機會不大，看來想翻身的紐約人前景並不樂觀。球隊戰績差，但林書豪在紐約的前景依然一片光明，日前仲獲大導演史碧奇李（Spike Lee）開聲力撐留用。

紐約人老將巴朗戴維斯在第4回合主場贏熱火一戰傷出，經磁力共振檢查後，發現該名老牌控衞並非右膝甩臼咁簡單，而是膝蓋骨部分肌腱撕裂，兼前交叉韌帶及內側韌帶斷開。由於傷勢十分嚴重，紐約人已安排巴朗戴維斯於日內進行手術，初步預計將長抖達12個月。

碧比擔正隨時被「弱點攻擊」

由於極度缺乏「一號位」球員，賽前盛傳近日已復操的林書豪，有可能在明日作客熱火的生死戰復出做雷霆救兵，不過紐約人看守教練活臣昨日就暗示這個可能性不大：「我近日睇過林書豪練波，佢明顯唔喺狀態。嚟緊我哋會繼續密切留意J.Lin嘅狀況，但老實講，我真係唔指望佢會出戰，就算軍醫畀，上陣時間亦可能得幾分鐘。」

活臣已決定在明日的生死戰搵老將碧比擔任正選，雖然這位沙場老將上仗射入2記關鍵3分波，功架猶在，但活臣已準備好後路，倘若碧比被熱火「弱點攻擊」，可能會搵安東尼或JR史密夫負責控球「派牌」。

料以3880萬同林瘋續約

林書豪能否在明日復出救「人」屬未知之數，不過著名紐約人球迷、大導演史碧奇李昨日就開聲呼籲紐約人下季一定要留用林書豪。紐約球評家Popper估計，紐約人將利用中產特例，以500萬美元（約3,880萬港元）年薪與「林瘋」續約，希望藉其人氣繼續吸金。