維度爾開齋即登車手榜首位

德國「車神」維度爾再次得助紅牛戰車威力，昨於F1巴林站以由頭帶到尾姿態奪魁，開季4站終於「開齋」，更彈上車手榜首位，爭取總冠軍3連霸重現曙光，芬蘭「冰人」拉哥倫亦爭得亞席搶盡風頭，復出第4場即踏頒獎台，較出山3季依然「食白果」的舒麥加叻仔得多。

戰車升級由頭帶到尾

儘管賽前受到當地民眾示威暴亂陰霾籠罩，巴林站比賽昨晚仍順利舉行，維度爾駕駛經過調校升級的紅牛RB8戰車，排頭位起步相當「靚仔」，輕鬆帶出，並在沙塵滾滾賽道一直保持穩定的表現，即使末段被拉哥倫追至僅餘1秒，幸後者速度逐漸減慢，維度爾最終以3.3秒之差勝出，2012年首次捧盃。蓮花車隊同樣令人刮目相看，除「冰人」力保亞軍外，哥斯贊也獲季席，與拉哥倫齊齊企櫈仔。

經4站比併後，維度爾以53分迎頭飆上車手榜榜首，今季初嘗「一哥」滋味，但僅較「黑帝」咸美頓多4分，另一紅牛車手韋伯則力壓畢頓穩守第3位。下一站起將轉戰歐洲賽區，5月13日假巴塞隆拿上演第5站賽事。