滾友占士攞正牌任蒲

籃球場Crossover夜總會？有得做喎！NBA球會為搵錢絞盡腦汁，東岸勁旅熱火化腐朽為神奇，計劃將一個465平方米的夜總會塞入美航球場，開多條財路吸客掠水。消息指一眾球員、高層將攞正牌免費任玩，對於「Party King」勒邦占士及「爛蒲占媽」哥莉亞來說無疑是一大喜訊！

夜店文化殺入NBA，繼4年前湖人於斯台普斯中心開設Hyde夜總會後，就連熱火及紐約人都有意倣效。據《彭博商業周刊》報道，熱火已經與SBE集團總裁拿薩韋恩達成協議，計劃開設一間佔地465平方米、可容納200人的Hyde夜總會於美航球場南翼，預計會於今年10月底開業，迎合2012至13新球季。

不敵巫師 韋迪手指甩臼

據悉，這間Hyde夜總會的成本及收益將由熱火及SBE集團五五分帳，夜總會內設多個主題酒吧、休憩空間及私人餐廳，球員、球會行政人員及持賽日門票球迷可免費入場，拿薩韋恩表示：「家陣嘅球場已經紛紛引入夜生活元素，想增加噱頭同提高入座率？單靠賣Pizza同熱狗已經行唔通！」

獲美媒封為「Party King」的勒邦占士，今季開P次數冠絕聯盟，其爛蒲母親哥莉亞更經常被目擊「攬仔」，如今兩母子有個新「主場」實屬佳音。之不過熱火就肯定笑唔出，皆因球隊昨於主場以84:86不敵巫師，爭做東岸「一哥」任務幾近幻滅，韋迪亦因手指甩臼宣布緣盡常規賽，可謂賠了夫人又折兵。

公鹿爭季後賽誓屠「龍」

至於仍為季後賽席位努力的公鹿，最近就愈戰愈勇，明鬥速龍有望再下一城，主場讓5.5分要上盤。（now678台周二早上8:00直播）與此同時，勇士新兵波格特本周會進行足踝手術，肯定無緣為澳洲征戰倫奧。