一票難求來屆或移師新伊館

明年銀牌決賽有望移師新伊館！香港籃球比賽愈來愈受歡迎，排長龍次數愈來愈多，昨日更有Fans排隊逾3小時都未能買到門票，要在場外高舉「Need Tickets」牌，最終該位有心球迷（圖）要買黃牛飛先入到場，雖然只係貴正價10蚊，但此風絕不可長。

籃總主席陳瑞添透露，今季聯賽季後賽已定於新伊館開打，若到時入場數字有保證，明年銀牌決賽亦大有機會改於觀眾席更多的灣仔伊館上演：「若情況許可，我會立即向政府Book場，希望有更多人可以入場欣賞比賽。」陳瑞添又補充，票價不會因改場館而加價，同時會設立網上售票系統，方便球迷。