廿四孝陳敬然視愛犬如己出

「風之子」陳敬然當日為愛兒陳靖退役做「湊仔公」，原來這位「廿四孝」老竇亦是愛狗之人。愛心爆棚的「阿英」視愛犬Micha如己出，更要囝囝認Micha做阿哥，一家四口看似樂融融，但原來Micha過去曾因與陳靖爭寵患上抑鬱症，險送狗命，令「阿英」上了寶貴一課，明白狗仔都有尊嚴！

陳敬然過往為滑浪風帆東奔西走比賽，故於4年前從寵物店把當時僅得兩個月大的約瑟爹利Micha帶回家，希望自己出外比賽時，太太不會太過苦悶。不過「一家三口」的生活維持了兩年，愛子陳靖就出世，「阿英」想不到「升呢」做阿爸即遇上難忘經歷。

患抑鬱症唔食嘢

陳敬然說：「陳靖剛回家一、兩個星期，Micha沒有任何問題，但到囝囝3周大時，本身好活潑嘅Micha對我哋唔瞅唔睬，又唔食嘢，成個禮拜只縮在角落，有時仲四腳朝天咁抽筋，好似就死一樣。」

「阿英」當時立即帶Micha看獸醫，才驚覺Micha因妒忌BB患上抑鬱症：「醫生話佢抑鬱，所以叫我哋每日回家先叫叫牠，摸摸牠，玩10分鐘先抱BB，等佢知道自己有存在價值，幾天後果然無事，真神奇。」這個經歷亦令「阿英」有很深體會：「其實我哋好錫佢，當佢係仔一樣，但無想過原來狗都有情緒，呢次經歷話畀我哋知道不論人或狗，都要尊重佢哋，要諗吓佢哋嘅感受，對於我哋教小朋友有好大的領悟，之後我哋更叫囝囝認Micha做阿哥添。」

Micha愛兒妒忌變互愛

相處兩年多，「阿英」對於兩個「囝囝」相處亦花盡心思：「佢哋試過互咬，阿仔細個時又會打Micha，後來我哋不停講、不停教，佢哋相處好咗好多，阿仔有幾次更食咗Micha啲狗糧，食到咯咯聲，不過，依家大多數係Micha等陳靖畀食物，因為有時阿仔食飯食到天一半地一半，Micha就可以坐定定等食。」愛犬與愛子由妒忌變為互愛，「阿英」在過程中相信付出了莫大努力。