雙節棍女JuJu學泰拳闖娛圈
咪以為創作音樂人必定是斯文，參與過電影《詠春小龍》嘅靚女陳鈺芸（JuJu），由細到大食慣夜粥，學過洪拳、詠春、柔道同合氣道，雙節棍更係佢必殺技，簡直係娛樂圈新一代打女。最近JuJu搵香港拳擊總會榮譽主席徐家傑先生學埋泰拳，實行以拳腳代替音韻自我提升。
JuJu除咗對武術有興趣，更彈得一手好鋼琴，而且係理科達人，主修電腦科學及數學。大家咪以為JuJu得個樣，查實佢舞起雙節棍功架十足，睇得出苦練過唔少日子，負責採訪嘅攝影師都睇到嘩嘩聲，JuJu咁話：「起初練習成日受傷，有依家嘅成績，其實係用血同汗換番嚟。」
徐家傑：練武好材料
最近JuJu諗住自我增值學埋泰拳，就去咗由徐家傑先生創立嘅坤青拳會，學習泰拳。得到徐師傅悉心指導後，JuJu好快掌握到泰拳基本功，徐師傅話：「佢好有天分，屬於習武好材料。」由於JuJu長期習武，今次學埋泰拳，相信有利佢喺娛圈嘅發展，假以時日必定成獨當一面武打女星。
挑戰木人樁
劍指娛樂圈
增值學泰拳
雙節棍耍家