NBA短訊

黑客都搵林書豪着數

近日網絡流傳一個佯裝介紹J.Lin的「有毒」文件—「The incredible story of Jeremy Lin and the NBA new superstar.doc」，美國及台灣兩地的刑事部門，就警告網友如果在電郵中收到這份附加檔案，記得不要打開，以免電腦受病毒入侵。

安東尼獲加同人夾份租房瞓

曾3度入選全明星賽的安東尼獲加，最近被《體育畫報》揭露折墮生活，大屋變賣還債不特止，還要找人夾份租房住，連車都冇得揸，35歲的他已淪落到於D-League（發展聯盟）「R」撈，月入25,000美元，資不抵債。其實安東尼獲加職業生涯賺過1.08億美元波糧，可惜洗腳唔抹腳兼衰爛賭，兩年前已申請破產，令不少粉絲唏噓。

占士夏登為形象逆阿媽意

講名James Harden你未必識，但講到雷霆滿面鬍鬚的球員，你就一定記得！原來超級無敵「鮑魚擦」占士夏登，一向好乞佢老媽子憎，夏登媽直言「好怕掂到個仔塊面」，之不過占士夏登為了建立形象，才逆阿媽意留鬚：「我都係想人哋記得，雷霆除咗杜蘭特同韋斯布克之外，仲有我！」