高比搵專家訂造新面具
高比滅「火」！昨晨「小飛俠」轟入全場最高33分，率領湖人主場以93:83擊敗熱火錄得3連勝。「小飛俠」化身「面具俠」之後愈戰愈勇，佢今日仲會啟程往底特律拜訪面具專家，打造至型面具！
昨仗高比晨早入局，頭5次起手全中，成為「紫金兵團」由頭贏到尾的功臣。反觀早前於明星賽令高比鼻骨骨折的韋迪，昨仗不單只6犯離場，比賽途中更撼親頭疑似腦震盪，不少黑心湖人Fans紛紛表示「閃電俠」獲得報應。
戴上面具3戰合共轟入102分，高比雖以「面部焗桑拿」及「飲汗」來表達戴罩的苦況，不過「小飛俠」就稱面具勁旺自己，計劃今日到底特律拜訪面具專家、曾為公牛球星咸美頓設計面具的麥凱利，度身訂造1個更通爽兼有型的新面具。同時熱火球星勒邦占士落實與Dunkin' Brands簽訂1紙為期兩年價值100萬美元（約780萬港元）的合約，擔任該美國大型連鎖食肆的代言人，肩負打入中國、台灣、印度及南韓市場的重任。
韋迪（左）跳起，高比即刻縮開，唔通因為有陰影？（美聯社圖片）