高比 杜蘭特領西岸奪冠

高比拜仁、杜蘭特各領風騷！全明星周末重頭戲昨日爆發，西岸明星隊以152:149勇挫東岸明星隊奪冠，「小飛俠」如願超越「波神」紀錄成為明星賽得分王；KD則榮膺MVP圓夢。之不過熱火球星韋迪就化身大反派，疑似報復打爆高比個鼻之餘，更踩對方的紀錄遲早被打破，似乎有心同高比「過唔去」！

萬眾矚目的東西岸明星賽昨日假奧蘭多上演，場面一如以往星光熠熠，西岸兩大王牌高比拜仁及杜蘭特晨早入局，「小飛俠」頭6次起手命中5球並於全場攻入27分，職業生涯14次出戰明星賽累積271分，如願超越米高佐敦（262分）成為明星賽得分王。

占士關鍵時刻交失波

昨仗西岸明星隊佔盡上風，雖然東岸明星隊於下半場傾力反撲，戰至完場前18秒追到只落後1分，然而孭重飛的勒邦占士又試於緊急關頭失準，關鍵一擊交失波令東岸明星隊返魂乏術並以3分之差落敗，即使攻入36分亦難辭其咎，難怪「大帝」賽後黑口黑面勁自責。

同樣攻入36分的杜蘭特，全場有7個籃板、3次助攻及3個偷波，屬西岸明星隊最大贏波功臣，賽後獲得職業生涯首個明星賽MVP可謂實至名歸，KD表示：「兒時夢想終於成真，好多謝隊友猛咁餵波畀我，能夠將呢個獎座帶返俄克拉何馬城真係好開心！」

韋迪打爆高比個鼻

1個破「波神」紀錄、1個奪MVP圓夢，西岸雙星可謂各領風騷，之不過東岸明星隊球星韋迪則一反Nice常態，昨日突然飾演大反派，於比賽途中因一記粗野攔截令高比拜仁流鼻血，賽後「小飛俠」以頭痛為由缺席記者會，湖人官方更證實前者鼻骨骨折，「兇手」韋迪事後雖然公開道歉，但似乎毫無悔意：「查實高比都侵犯咗我兩次，不過我冇心o架！講番場波，杜蘭特抵攞MVP，佢仲咁後生，睇怕高比個得分王紀錄都唔慌Keep得耐。」