奀星入樽賽邊個冠軍你話事

入樽賽明日「Dunk」場，格芬、杜域侯活及勒邦占士等鋤樽好手通通冇份，取而代之由布丁加、戴歷威廉士、保羅佐治及謝路美伊雲斯4大奀星擔大旗，堪稱入樽賽史上至削戲碼。4大「茄喱啡」失驚無神做主角，定必把握機會博出位，盛傳幾位參賽者更會擺姚明、「小鳥」布特及列比奧上枱拉票，今屆入樽賽隨時愈冇期望，愈有驚喜！

1 Round定生死

去屆格芬榮膺入樽賽冠軍被指內定，聯盟於是順應民意廢除評委機制，將話事權交給球迷，讓廣大觀眾透過NBA官網、Twitter甚至SMS形式投選心水冠軍。今屆賽事由以往的兩Round濃縮為一Round定生死，4位參賽者各自進行3次入樽，毋須擔心絞盡腦汁度好的必殺技無用武之地。

溜馬二年生保羅佐治日前透露，已致電邀請球會總裁兼傳奇球星布特助陣，豪言其入樽招式將前無古人；新秀戴歷威廉士今季於木狼與列比奧擦出火花，今次邀得「金童」幫手肯定默契十足；至於頂替因傷退賽的森柏特參戰的爵士球星謝路美伊雲斯，於大學時代已有「學界入樽王」稱號，絕對不容忽視。

但講到最醒目，肯定非布丁加莫屬！這位火箭前鋒被踢爆會飛越1:1的紙牌姚明鋤樽，勢必搶到不少亞洲球迷的選票。

全明星周末秩序

新秀賽‧周六早上10:00（now635台、廣東體育直播）

投籃之星、技巧挑戰賽、3分賽、入樽賽

周日早上9:30起（now635台直播）

東西岸明星賽‧周一早上8:00（now635台、高清翡翠台直播）