李慧詩競輪賽摘銀犧牲大 黃金寶睇見都心痛

香港「女車神」李慧詩（Sarah）連環大爆發，繼贏得爭先賽銅牌後，周日於世界盃英國站煞科日再有超水準表現，憑強勁衝刺力「爆」贏中國「宿敵」郭爽，首奪同為奧運項目女子競輪賽銀牌，實力全面「升呢」！「大師兄」黃金寶激讚Sarah「好犀利」，衝擊世界冠軍甚至奧運獎牌指日可待，卻同時心疼「師妹」為單車運動付出一切：「一個女仔靠自己，絕對唔容易！希望外界唔好畀佢咁大壓力！」

近態「弗」到漏的李慧詩，通過多輪預賽強勢晉級由6人爭逐的金牌戰，即使對手大有來頭，包括京奧冠軍英國彭迪爾頓、世界冠軍中國郭爽、澳洲美雅絲等，惟Sarah全無懼色，開賽初段一直留守第5位置，踩至最後一個衝刺圈睇準機會由中路「爆出」，先過彭迪爾頓，再從內線「頂」開郭爽「飆」上次席，雖然最終以一個車位不敵立陶宛的古柏卡迪，但這面銀牌仍彌足珍貴，絕對是該位24歲女將單車生涯重大突破。

沈金康揚言已獲奧運資格

4站世界盃完結後，世界場地錦標賽將於4月4至8日假墨爾本舉行，成為港將搶分最後機會，倫奧資格也在4月下旬落實，不過港隊教練沈金康已「事先張揚」：「李慧詩應該獲得競輪賽和爭先賽資格。」

Sarah早前在亞洲賽獨攬雙冠，今次倫敦之行又獲1銀1銅，令香港車壇再添輝煌，作為「老大哥」的黃金寶最感欣慰：「佢真係好犀利！自從贏咗亞運金牌，信心提升咗好多，而且一直接受場地專項訓練，毋須兼顧踩公路，加上生心上已長大成人，所以進步特別快，但喺香港終於冇咁多人陪練，佢可以話係開荒牛，乜都要靠自己，好唔容易！」

阿寶：唔好畀太大壓力佢

「女孩子個個都想有窈窕身材，但Sarah要發展短途項目一定要練大隻，犧牲好大，有時睇見都覺得好心痛……」「阿寶」對師妹李慧詩特別痛錫，更預言她力足為港贏得第3件「彩虹戰衣」：「佢仲年輕，將來一定有機會揚威世界賽甚至奧運，不過唔希望大家畀太大壓力。」黃金寶這位大師兄對Sarah甚具影響力，後者於廣州亞運前失眠就曾找「師兄」做「心理輔導」，最終摘下首金亦第一時間致電對方說多謝！

上周重奪亞洲賽金牌的黃金寶，已從吉隆坡旋歸，今日返回廣州龍崗訓練基地，備戰3月10日展開的環台單車賽。

「女車神」2月大豐收

吉隆坡亞洲賽

500米計時賽 金牌

爭先賽 金牌

競輪賽 銅牌

英國世界盃

競輪賽 銀牌

爭先賽 銅牌