寄語師弟衝出亞洲
黃金寶重奪金牌令人拜服，但今屆亞洲賽「爆」出了「4金王」梁峻榮更讓香港車壇欣喜，「阿寶」揚言港隊接班已無憂，卻寄語「師弟」繼續堅持，並要有「衝出亞洲、放眼世界」的抱負。
梁峻榮爆發港隊成大贏家
香港大軍吉隆坡之行大豐收，場地賽豪取10金5銀5銅，公路賽添3金1銀2銅，合計13金6銀7銅（精英組佔6金3銀4銅），盡破港隊參加亞洲賽紀錄，成為金牌大贏家！其中17歲城運金牌得主梁峻榮大爆發，獨取4冠膺「金牌王」，獲黃金寶大讚有前途：「佢本身有條件，從小就接受有系統訓練，不過由青年組跳上成人組，中間會有好多掙扎，條路仲好長，希望佢肯捱苦，遇到困難都要堅持。」
「阿寶」續說：「其實港隊已經好有長遠規劃，不論硬件軟件都齊全，車手目標唔應該停留亞洲，要去衝世界賽、世界盃、奧運獎牌，香港單車發展先有未來！」除黃金寶及梁峻榮外，女將亦有好表現，李慧詩奪雙冠，黃蘊瑤及刁小娟均首嘗亞洲賽金牌滋味。
17歲的梁峻榮今屆獨取4金，為港隊帶來驚喜。