阿寶對手勸佢咪收山

他是英雄、他是傳奇、他是神話，他是黃金寶！該位下月就滿39歲的「亞洲車神」再次用行動證明自己「愈老愈癲」，昨於吉隆坡亞洲單車賽煞科戰男子個人公路賽力壓群雄，一搔11年之癢重奪金牌完美「埋齋」，協助港隊狂掃13金6銀7銅做獎牌榜「一哥」！「阿寶」接受長途電話訪問時坦言，臨近收山仍能「踩」上亞洲之巔，感覺開心又「得意」，對手更紛紛嚷「唔好退休」呢！

亞洲單車賽

黃金寶今屆亞洲賽棄戰場地項目，集中應付個人公路賽，結果憑超強衝刺力「一擊即中」！賽事全長179.2公里，來自24個國家和地區共70名車手角逐，「阿寶」聯袂陳振興、高肇蔚和楊英瀚出擊，全程主動搶攻，「車神」憶述奪標過程說：「今次贏在戰術部署，每次有人突圍，我哋4個都會輪流跟出去，令其他對手追趕消耗體力，臨尾『阿興』（陳振興）等5人小組突圍，最後5公里，我同一個台北車手合作追前，至終點前800米至1公里，我發力連追帶衝，好開心畀我衝贏咗！」這是黃金寶繼01年後第2面亞洲公路賽金牌，伊朗蘇哈比及日本西谷泰治分奪亞、季軍，陳振興位列第5，其他兩位港將則隨主車群衝線。

主動叫車手合照留念

「38歲仲贏冠軍，你係咪癲o架？」長途電話接通後，小記忍不住問。心情靚爆的「阿寶」答道：「吓！唔知喎！就嚟收山都攞冠軍，感覺都幾得意！」他表示已忘了對上一次封王是11年前的事，也沒刻意去想這面金牌有何特別意義，但「車神」透露：「企喺頒獎台嗰陣，我真係諗『唔通又唔退得住』！之後我第一次主動叫其他車手合照，我同佢哋講『今屆可能係我最後一次』，點知個個都話『唔好』！」

踩唔踩奧運視乎狀態

去年已為退役鋪路的黃金寶，強調今次摘金不會令他改變初衷，對於倫敦奧運仍抱隨緣態度：「我係好唔捨得，但點都會退落嚟，至於是否踩埋奧運，順其自然吧！主要視乎過多2個月嘅狀態，始終舊年炒車斷完鎖骨後，恢復比較慢，老實講，如果自己唔Fit，何不畀機會年輕車手？」「車神」明日凱旋而歸，返回廣州訓練基地繼續備戰。

至於日前獲團體追逐賽銀牌的「四小龍」郭灝霆、蔡其皓、張敬煒和張敬樂，昨轉戰倫敦世界盃場地賽發揮平平，在這個奧運項目初賽只以4分14秒280排16位，無緣決賽；蔡其皓記分賽得第5，張敬樂1公里計時賽僅列19，女將李慧詩則於爭先賽晉級8強。