林書豪爆發保住主帥飯碗

林書豪爆發拯救紐約人！美籍華裔控衞林書豪昨日大發神威，後備登場喪入25分，刷新NBA生涯8項紀錄，最終帶領紐約人以99:92勇挫籃網。年薪僅得76萬美元（約589萬港元）的林書豪霎時間人氣急升，今戰立下大功保住主帥迪安東尼飯碗，明日鬥爵士隨時「升呢」擔正，於NBA舞台為華人爭光！

紐約人近13戰輸足11場，盛傳主帥迪安東尼已經聞到魷魚香，迪帥今戰孤注一擲，於第2節派林書豪落場搏殺，此子上陣36分鐘貢獻25分、7次助攻及5個籃板，無論出場時間、得分、防守籃板、助攻、起手次數、命中率、罰球次數及3分球起手次數都刷新NBA生涯新高，最終率領紐約人以7分之差贏波，結束兩連敗。

「無家可歸」瞓菲爾斯屋企梳化

賽後足足有過千名球迷留在麥迪遜廣場觀看林書豪接受訪問，還高歌讚頌這位華裔球員，其名字更一度攀升上社交網站Twitter的「熱門搜尋榜」第1位，難怪這位23歲控衞賽後飄飄然：「賽前一晚我冇地方瞓，卒之去咗菲爾斯（紐約人後衞）屋企瞓梳化，估唔到嗰度咁旺我，或者我會考慮搬去同佢住！」

林書豪立大功後獲主帥迪安東尼激讚，明早鬥爵士更有望擔正再顯身手，強勢反彈的紐約人主場受讓1.5分當然撐下盤。